2024 jylǵy 28 qazanda Ulan-Batyr qalasynda Qazaqstan Respýblıkasynyń Prezıdenti Qasym-Jomart Toqaevtyń Mońǵolıaǵa memlekettik sapary aıasynda Qazaqstan-Mońǵolıa İskerlik keńesiniń alǵashqy otyrysy ótti, dep habarlaıdy aqshamnews.kz QR SDIAÓM baspasóz qyzmetine silteme jasap.
İs-shara barysynda eki eldiń iskerlik orta men memlekettik qurylym ókilderi birlesken jumystyń basym baǵyttaryn talqylady.
Sıfrlyq damý mınıstri Jaslan Mádıev óz sózinde ınovasıalyq ekojúıeni qurý, startap-jobalardy damytý, sıfrlyq úkimetti (govtech) engizý jáne aeroǵarysh salasyndaǵy jobalar boıynsha yntymaqtastyqty nyǵaıtý jónindegi negizgi baǵyttardy atap ótti.
Qazaqstan óz kezeginde Astana Hub halyqaralyq tehnoparkin damytý tájirıbesimen bólisti, onyń jumysy barysynda 1500-den astam rezıdent, sonyń ishinde 436 sheteldik kompanıa tartyldy. Sonymen qatar, Ortalyq Eýrazıadan shyqqan startaptardy jahandyq naryqtarda qoldaýǵa baǵyttalǵan shetelderde IT-habtar qurýdyń tabysty tájirıbesi de usynyldy.
Qazaqstandyq Jet kompanıasynyń elektr skýterlerin jalǵa berý startapynyń Mońǵolıa naryǵyna shyǵýy sátti bolǵany atap ótildi – ol 6 myńnan astam skýter usyndy. Sonymen birge, mońǵol startaptary da Astana Hub akselerasıalyq baǵdarlamalaryna belsendi qatysyp keledi. Mysaly, Fibo Group startapy tehnoparkte Google for Startups akselerasıalyq baǵdarlamasynan sátti ótti. Bul baǵdarlamaǵa qatysý startaptarǵa halyqaralyq tájirıbe men jetekshi sarapshylardyń qoldaýyna jol ashady, bul olardyń ári qaraı damýy men jahandyq naryqtarǵa shyǵýy úshin mańyzdy qadam sanalady.
Yntymaqtastyqtyń taǵy bir mańyzdy elementi retinde qazaqstandyq elektrondyq úkimet júıesi eGov eksportyn talqylaý júrgizildi. Bul joba Mońǵolıaǵa Qazaqstannyń memlekettik qyzmetterdi sıfrlandyrýdaǵy jetistikterin qoldanýǵa múmkindik beredi, munda qyzmetterdiń 90%-dan astamy onlaın rejıminde usynylady.
İskerlik keńestiń alǵashqy otyrysy turaqty damýǵa jáne zamanaýı syn-qaterlerdi birlesip eńserýge baǵyttalǵan strategıalyq seriktestiktiń berik negizin qalady.