Qazaqstanda Tájikstanmen birlesken 418 kásiporyn jumys istep tur
Qazaqstan men Tájikstan arasynda júk tasymaly artyp keledi. Bıyl birinshi toqsanda temirjol kóligimen tranzıttik tasymal kólemi 28 paıyzǵa ósken, dep habarlaıdy Almaty-akshamy.kz.
Sonymen qatar, osy kóliktiń túrimen eksport-ımport kólemi 20 paıyzǵa kóterilgen. Búgin bizdiń el men Tájikstannyń 300-den asa kásipkeri bas qosqan bıznes-forýmda eki eldiń ekonomıkalyq qarym-qatynasy sóz boldy. Kelisim negizinde jalpy somasy 2 mıllıard dollar bolatyn birneshe qujatqa qol qoıyldy. Jıynda Qazaqstannyń saýda mınıstri Serik Jumanǵarın bizdiń el Tájikstanǵa bıdaı men un eksportyn arttyrýǵa daıyn ekenin málimdedi.
«Bıyldyń ózinde maýsymaralyq kezeńde Tájikstannan Qazaqstanǵa áleýmettik mańyzy bar agroónimderdi jetkizý týraly ýaǵdalastyqqa qol jetkizildi. Bul bizdiń ózara is-qımylmyzdyń shegi emes ekenine senimdimin. Meniń tapsyrmam boıynsha bıyl qazaqstandyq bıznes ókilderi bar birneshe delegasıa sol elge baryp keldi. Tájikstanǵa jyly qabyldaǵany úshin alǵys aıtqym keledi. Biz óz tarapymyzdan kúnbaǵys maıy, bıdaı jáne un eksportyn arttyrýǵa daıynbyz», – dedi QR Premer-Mınıstriniń orynbasary – Saýda jáne ıntegrasıa mınıstri Serik Jumanǵarın.
Qazir Qazaqstanda Tájikstanmen birlesken 418 kásiporyn jumys istep tur. Onyń 98 paıyzy shaǵyn bıznes eken. Óz kezeginde Tájikstannyń vıse-premeri Sýlaımon Zıózoda eki el arasyndaǵy yntymaqtastyqty joǵary baǵalaıtynyn aıtyp, Tájikstanda Qazaqstan kapıtalynyń qatysýymen 100-den astam birlesken kásiporyn qurylyp, jumys istep jatqanyn jetkizdi. Ónerkásiptik kooperasıa salalaryn keńeıtýge qoldaý jasalyp otyr eken.
«Tájik-qazaq qarym-qatynastarynda yntymaqtastyqtyń ekonomıkalyq bóligin keńeıtý turǵysynda zor múmkindikter bar ekenin atap ótkim keledi. Búginde Tájikstanda ekonomıkaǵa ınvestısıa tartý úshin barlyq jaǵdaı jasalǵan. Bank jáne ekonomıkanyń naqty sektorlaryn qoldaýǵa nazar aýdarylyp otyr. Sıfrlyq ekonomıkany damytý jáne ınovasıalyq tehnologıalardy engizý salasyndaǵy yntymaqtastyqty jandandyrý eki eldiń álemdik deńgeıde básekege qabilettiligin arttyrýǵa yqpal ete alady», – dedi Tájikstan vıse-premeri Sýlaımon Zıózoda.