Balalar fýtbolyn damytýǵa arnalǵan baǵdarlama
Qazaqstan fýtbol federasıasynyń prezıdenti Ádilet Barmenqulov Halyqaralyq fýtbol federasıasynyń (FIFA) prezıdenti Djannı Infantınomen ótken baspasóz konferensıasynda buqaralyq fýtboldy damytý baǵytyndaǵy josparyn ortaǵa saldy, dep habarlaıdy Almaty-akshamy.kz QazAqparatqa silteme jasap.
«Bizdiń negizgi mindet – fýtboldy sapaly jáne qoljetimdi etý. Osy turǵydan alsaq, buqaralyq fýtboldy damytý úshin bar kúshimizdi salyp jatyrmyz. FIFA-men úlken-úlken úsh baǵytty damytýǵa kelistik. Balalar fýtbolyn damytýǵa arnaıy baǵdarlama jasap jatyrmyz», - dedi federasıa basshysy.
Sondaı-aq, ol fýtbol ınfraqurylymyn damytý baǵytyndaǵy josparlarǵa toqtaldy.
«Buıyrsa, aldymyzda 20 qalada fýtbol alańyn salsaq, sodan keıin aýyldarǵa kóshemiz. «Aýyldaǵy fýtbol» baǵdarlamasy boıynsha 50 aýylda oıyn alańyn salyp bersek dep otyrmyz. Buqaralyq fýtboldy kóterýge qajet eń basty dúnıe sol dep senemin», - dedi Qazaqstan fýtbol federasıasynyń prezıdenti.