İs-sharada soǵys taqyrybyndaǵy ánder shyrqaldy
Almatyda tyl eńbekkerlerine qurmet kórsetildi. Ulttyq ulan ońtústik óńirlik qolbasshylyǵynyń qyzmetkerleri men sarbazdary olardy «Shańyraq» áleýmettik ortalyǵyna arnaıy quttyqtap baryp, syılyǵyn tartý etti, dep habarlaıdy Almaty-akshamy.kz Almaty.tv-ge silteme jasap.
Estrada juldyzdarynyń qatysýymen merekelik baǵdarlama uıymdastyryldy. Jeńis kúni qarsańynda ótken is-sharada soǵys taqyrybyndaǵy ánder shyrqaldy.
«Búgin ujymmen birge «General» degen top keldi. Ol top osydan 9 jyl buryn Qorǵanys mınıstri Rýslan Fatıhulynyń bastamasymen qurylǵan edi», – dedi Ulttyq ulan ońtústik óńirlik qolbasshylyǵynyń basqarma bastyǵy Arman Seıitov.
Búginde qaladaǵy «Shańyraq» áleýmettik ortalyǵynda 273 egde jastaǵy qarıa turady. Olardyń arasynda 89 múmkindigi shekteýli jan bar. Al 27 qarıa – tyl maıdangeri. Basqarma basshysynyń aıtýynsha, Jeńistiń 78 jyl tolýyna arnalǵan bıylǵy merekede olardyń eshqaısysy eskerýsiz qalmaıdy.
«Ár kúnimiz búgingideı merekege ulassyn. Balalarymyzdyń uıqysy tynysh bolsyn. Biz kórgen qıyndyqty, beınetimizdi keıingi urpaq kórmese eken dep tileımin. Merekeden merekege aman jeteıik», – dedi tyl ardageri Valentına Ershova.