Sý resýrstary jáne ırrıgasıa mınıstrligi Qytaı Halyq Respýblıkasy Sý sharýashylyǵy mınıstrligimen sý tasqynymen kúres baǵytynda yntymaqtastyq jónindegi Memorandýmǵa qol qoıýdy josparlap otyr.
Mınıstr Nurjan Nurjigitov Úkimet otyrysynda sý tasqynyna daıyndyq barysy týraly baıandady, dep habarlaıdy aqshamnews.kz Cý resýrstary jáne ırrıgasıa mınıstrligine silteme jasap.
Budan bólek, vedomstvo Reseı Federasıasymen sý tasqyny kezeńinde taraptardyń is-qımylyn úılestirý úshin barlyq transshekaralyq sý aǵyndary boıynsha biryńǵaı jumys tobyn qurý týraly ýaǵdalastyqqa qol jetkizdi.
«Tasqyn sýdy jınaý jáne qaýipsiz ótkizýdi qamtamasyz etý úshin mınıstrlik 2,6 mlrd tekshe metr sý saqtaı alatyn 42 jańa sý qoımasyn salýdy, jalpy jobalyq kólemi 3,7 mlrd tekshe metr bolatyn 37 sý qoımasy men 14,5 myń shaqyrym ırrıgasıalyq kanaldy rekonstrýksıalaýdy josparlap otyr. Bıyl Túrkistan oblysynda 2 sý qoımasynyń qurylysy bastaldy. Aqtóbe, Túrkistan jáne Batys Qazaqstan oblystarynda 3 sý qoımasy keshendi rekonstrýksıadan ótýde. Sondaı-aq, Qazsýshar fılıaldary sý tasqyny kezinde úlken kólemde sý qabyldaǵan 34 gıdrotehnıkalyq qurylysty jóndeý jumystaryn bastady. Batys Qazaqstan jáne Shyǵys Qazaqstan oblystarynda 95 shaqyrym kanaldy mehanıkalandyrylǵan tazalaý jumystary júrgizildi»,- dedi mınıstr Nurjan Nurjigitov.
Aıta ketý kerek, sý tasqyny jaǵdaıy tek jaǵymsyz saldarǵa ǵana emes, sonymen qatar sý qoımalaryna ekonomıka salalarynyń qajettilikteri úshin paıdalanylatyn 12 mlrd tekshe metrden astam sý jınaýǵa múmkindik berdi.
Mysaly, Q.Sátbaev atyndaǵy kanal arqyly toltyrylatyn Astana sý qoımasyna tasqyn sýyn jınaý 2 mlrd teńgeden astam qarajatty únemdeýge múmkindik berdi.
Sondaı-aq, tasqyn kópten beri tirshilik nári barmaǵan jerlerge sýdy baǵyttap, ekologıalyq jaǵdaıdy jaqsartýǵa múmkindik berdi. Mysaly, Batys Qazaqstan oblysynyń Qamys-Samar kólderine 80 mln tekshe metr, Ulytaý oblysynan Qyzylorda oblysyna 839 mln tekshe metr sý jiberildi. Tarıhta alǵash ret Sarysý ózeni arqyly Qyzylorda oblysynyń kól júıelerine sý jetkizildi.
Jyl basynan beri Balqash kóline 12 mlrd tekshe metr, Kaspıı teńizine – 7,4 mlrd tekshe metr sý jiberildi.
2024 jylǵy qyrkúıek aıynyń basyndaǵy jedel derekterge sáıkes, sý qoımalarynan aýyl sharýashylyǵynda 8,4 mlrd tekshe metr, ónerkásipte 3,7 mlrd tekshe metr sý paıdalanyldy.