Almaty qalasynda Qazaqstan Respýblıkasynyń tuńǵysh Qorǵanys mınıstri Saǵadat Nurmaǵambetovti eske alý sharasy ótti. Saltanatty jaǵdaıda Keńes Odaǵynyń Batyry, Halyq Qaharmany, armıa generaly Saǵadat Nurmaǵambetovtyń memorıaldyq taqtasyna gúl shoqtary qoıyldy, dep habarlaıdy aqshamnews.kz.
Táýelsiz Qazaqstannyń tuńǵysh Qorǵanys mınıstrin eske alýǵa onyń qyzy Aısulý Nurmaǵambetova, dostary, áriptesteri, Qazaqstan Respýblıkasynyń Qarýly Kúshteriniń ardagerleri, Saǵadat Nurmaǵambetov atyndaǵy Qurlyq áskerleriniń áskerı ınstıtýtynyń kýrsanttary, Almaty qalasy Qorǵanys isteri departamentiniń ofıserleri jáne Áskerı-ınjenerlik radıoelektronıka jáne baılanys ınstıtýtynyń merzimdi qyzmettegi áskerı qyzmetshileri qatysty.
«24 qyrkúıek 2013 jyly Keńes Odaǵynyń Batyry, Halyq Qaharmany, táýelsiz Qazaqstannyń tuńǵysh Qorǵanys mınıstri Saǵadat Nurmaǵambetov dúnıeden ozdy. Ol óte adal, ádil jáne áskerı zıalylardyń biregeı ókili boldy. Qazaqstan armıasynyń qalyptasýynda onyń eńbegi zor», -dep atap ótti «Ofıserler odaǵy» qoǵamdyq birlestiginiń tóraǵasy, general-maıor Mahmut Telegýsov.
«Saǵadat Nurmaǵambetovtyń kásibı jáne tulǵalyq qasıetteri erekshe bolǵanymen, ol óte qarapaıym, ustamdy adam edi. Ol kez kelgen isinde ádildik pen adaldyq tanytty. Mundaı tulǵa ózine degen qurmetke laıyq jáne biz ony árqashan este saqtaımyz», — dedi ol.
Gúl shoqtaryn qoıý rásiminen keıin, ańyzǵa aınalǵan general turǵan úıdiń janyndaǵy kóshede Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary men desanttyq-shabýyldaý áskerleriniń áskerı qyzmetshileri saltanatty marshpen júrip ótti.
Aıta keteıik, Saǵadat Nurmaǵambetov elimizdiń ulttyq Qarýly Kúshterin qurýǵa orasan zor eńbek sińirdi. Onyń esimi tarıhta altyn áriptermen jazylyp qalatynyn anyq. Jáne de qorǵanys salasyndaǵy eńbekteri kóptegen urpaq úshin mura bolyp tabylady. Táýelsiz memleketterdiń qurylý kezeńinde TMD elderiniń Qorǵanys mınıstrleri arasynda Uly Otan soǵysyna qatysqan jalǵyz adam Saǵadat Nurmaǵambetov edi.
Onyń esimi árbir qazaqstandyqtyń júreginde máńgi saqtalady. Onyń búkil ómiri – Otanǵa adal qyzmet etý joly, bul bizdiń memleketimizdiń jáne armıamyzdyń qalyptasý tarıhy.