Búgin Qazaqstan Respýblıkasynyń Ǵylym jáne joǵary bilim mınıstri Saıasat Nurbek pen Qytaı Halyq Respýblıkasy Bilim mınıstriniń orynbasary Sýn Iaonyń kezdesýi ótti.
Kezdesý barysynda ýnıversıtetaralyq seriktestikti damytý, eki el stýdentteriniń akademıalyq bilim almasýy, qos dıplomdyq jáne birlesken bilim berý baǵdarlamalaryn júzege asyrý, ýnıversıtet fılıaldaryn ashý sıaqty yntymaqtastyqty odan ári damytý syndy mańyzdy taqyryptar kóterildi, dep habarlaıdy Almaty-akshamy.kz.
QR Ǵylym jáne joǵary bilim mınıstrliginiń málimetinshe, sondaı-aq, Qytaıdyń Qazaqstandaǵy jetekshi ýnıversıtetteri, ál-Farabı atyndaǵy QazUÝ-de birlesken qazaq-qytaı ǵylymı ortalyǵyn qurý, jańa Lý-Ban semınarlaryn ashý jáne qytaı tilinde oqytýshylar daıarlaý isi naqtylandy.
Mınıstr óz kezeginde qytaılyq áriptesine qazaqstandyq joǵary oqý oryndarymen tyǵyz qarym-qatynas úshin alǵys bildirdi. Sondaı-aq, Qazaqstandaǵy sheteldik ýnıversıtetterdiń fılıaldary men Qytaıdaǵy tájirıbe ortalyqtarynyń ashylýyna jan-jaqty toqtaldy.
«Sońǵy 1,5 jylda jetekshi sheteldik ýnıversıtetter men ortalyqtardyń, sonyń ishinde Qytaıdyń seriktestik fılıaldaryn qurý boıynsha aýqymdy jumystar atqaryldy. 2023 jyldy qorytyndylaǵan tamasha jetistikterdiń biri D.Serikbaev atyndaǵy Shyǵys Qazaqstan tehnıkalyq ýnıversıteti bazasynda «Lý-ban sehynyń» ashylýy boldy. Bizdiń dostyǵymyzdyń aıqyn dáleli Jibek joly ýnıversıtetteriniń alánsyna qatysý bolyp tabylady. Qazirgi ýaqytta 8 qazaqstandyq joǵary oqý orny alánsqa múshe bolsa, kelesi jyly olardyń sany odan ári artady. Munyń bári bizdiń Mınıstrliktiń jańashyl bastamalarǵa daıyn ekenin kórsetedi», - dedi S.Nurbek.
Qos tarap kezdesýde birneshe usynystardy talqylaýǵa ortaǵa saldy. Qazaqstan azamattarynyń QHR ýnıversıtetterinde bilim alýǵa degen joǵary qyzyǵýshylyǵyn eskere otyryp, eki elden stýdentterdiń balamaly almasýyn 100-den 150 orynǵa deıin ulǵaıtýdy, sondaı-aq til úırený kýrstaryna bólek oryndar bólip, QHR ýnıversıtetterinde oqý múmkindigin keńeıtý máselesi aıtyldy. Qytaı tarapy bul usynystardy qoldaýǵa tolyq daıyn ekenin bildirdi.
Sonymen qatar, Saıasat Nurbek Qytaı tarapyna ekijaqty formattaǵy yntymaqtastyqty keńeıtý maqsatynda Qazaqstan Respýblıkasy men Qytaıdyń Yntymaqtastyq komıteti janynan Joǵary bilim berý salasyndaǵy kishi komıtet qurýdy usyndy. Bul bastama ekijaqty tıimdi áreketterdi jeńildetýge baǵyttalǵan.
Óz kezeginde Qytaı delegasıasy qurmet retinde qazaqstandyq tarapqa atalǵan múmkindikter úshin alǵys bildirip, naqty ózara is-qımyl strategıalaryn damytý men nyǵaıtýdy jalǵastyrýǵa nıetti ekenin atap ótti.
«Qytaı men Qazaqstan tatý kórshi, bizdiń yntymaqtastyǵymyz odan ári nyǵaıa túsedi. Biz óz tarapymyzdan qazaqstandyqtarǵa Qytaıdyń jetekshi ýnıversıtetterinde sapaly bilim alý úshin barlyq múmkindikti berýge daıynbyz. Qazir bizdiń ýnıversıtetter qazaqstandyq stýdentterdi bakalavr dárejesine qabyldaıdy, endi magıstranttar men doktoranttardy daıyndaý jumysyn kúsheıtýdi kózdep otyrmyz», - dedi Sýn Iao.
Kezdesý sońynda mınıstr ýnıversıtetaralyq yntymaqtastyqty qoldaıtynyn atap ótti. Eki jaq yntymaqtastyqty nyǵaıtýǵa jáne eki eldiń joǵary bilimin damytý úshin bolashaqta aıanbaı kúsh biriktirýge daıyn ekendikterin bildirdi.