Bıyl elimizde jaqsylyqpen qatar jan syzdatqan oqıǵa da az bolǵan joq.
Osy apattardyń kesirinen júzden asa adam kóz jumdy, dep habarlaıdy Almaty-akshamy.kz
2023 jyly elimizde oryn alǵan iri apattar
JÚRGİZÝSHİSİZ AVTOBÝS 5 ADAMNYŃ AJALYNA SEBEP BOLDY
8 sáýirde Shymkent qalasynda avtobýs júrgizýshisi aıaldamaǵa jetpeı, avtobýsty toqtatqan. Sodan keıin avtobýstyń qol tejegishin tartyp qoımaı, odan túsip, sol jerdegi dámhananyń dárethanasyna kirip ketken. Iesiz qalǵan avtobýs ózdiginen qozǵalyp, Baıterekov pen Nazarbekov kóshesiniń qıylysyndaǵy qarsy baǵyttaǵy baǵdarshamnyń aldynda turǵan 6 jaıaý júrginshini qaǵyp ketken. Apat saldarynan 5 adam qaza tapty. Avtobýs júrgizýshisi óz kinásin tolyq moıyndady. Sot júrgizýshini Qylmystyq kodekstiń 345-baby 4-bóligimen kináli dep tanyp, kólik júrgizý quqyǵynan 7 jylǵa, bas bostandyǵynan 5 jylǵa aıyrdy.
«SEMEI ORMANYNDAǴY» ÓRT
8 maýsymda «Semeı ormany» aýmaǵynda alapat órt bolyp, kesirinen 14 adam kóz jumdy. Órt aýmaǵy 60 myń gektardy sharpydy. Osyǵan baılanysty Semeı qalasynda tótenshe jaǵdaı jarıalandy. Abaı óńirinde bolǵan el tarıhyndaǵy eń iri órtke baılanysty Tótenshe jaǵdaılar mınıstrliginiń basshysy Iýrıı Ilın qyzmetinen bosatylyp, ornyna jańa mınıstr taǵaıyndaldy. Abaı oblysynyń ákimi óz mindetin durys atqarmaǵany úshin sógis aldy. Prezıdent Qasym-Jomart Toqaev Abaı oblysynda bolyp, qaza tapqandardyń otbasylarymen kezdesti. Órt faktisi boıynsha qylmystyq is qozǵaldy. «Semeı ormany» aýmaǵyndaǵy qaıǵyly oqıǵaǵa baılanysty 12 maýsym elimizde Aza tutý kúni bolyp jarıalandy.
TÚRKİSTANDA TİRİDEI ÓRTENGEN 9 ADAM
Shildede Túrkistan oblysynyń Báıdibek aýdanyndaǵy Ekpindi men Shaıan aýyldarynyń arasyndaǵy jolda bolǵan jantúrshigerlik jol apatynan 10 adam qaza tapty. Báıdibek aýdanynda joǵary jyldamdyqpen kele jatqan úsh kólik soqtyǵysyp, 9 adam tirideı órtenip ketken. Taǵy bir aýyr jaraqat alǵan naýqas ota kezinde kóz jumdy.14 adam aýyr jaraqat aldy. İri jol apaty tańǵy saǵat 09:00-de bolǵan. Qos kólik qana sıatyn tar jolda Nissan jeńil kóligi qarsy baǵytqa shyǵyp, Sozaq aýdanynan kele jatqan jolaýshylar toly shaǵyn avtobýspen betpe-bet soǵylǵan.
«QAZAQSTAN» SHAHTASYNDAǴY APAT
17 tamyz kúni saǵat 10:05-te «ArselorMıttal Temirtaý» AQ taý-ken óndirý dıreksıasynyń «Kazahstanskaıa» shahtasynda D6 kómir baýraıynda konveıer lentasy órtendi. «PVASS» RTSSH úsh bólimshesi (15 qyzmetker jáne 5 tehnıka) jáne Tótenshe jaǵdaılar departamentiniń 8 qyzmetkeri men 2 tehnıkasy jumyldyryldy. Bul kezde shahtadaǵy 227 adamnyń 222-si evakýasıalanyp, 5-i qaıtys boldy.
AIaGÓZDEGİ 4 BALANYŃ ÓLİMİ
Qazan aıynda Abaı oblysy Aıagóz qalasynda jeke úılerdiń birinen órt shyǵyp, qutqarýshylar tórt balanyń denesin tapty. Balalardyń ákesi jedel járdem júrgizýshisi bolyp jumys isteıdi. Anasy úı sharýasynda eken. Sol kúni sút satyp, dúkennen azyq-túlik almaqshy bolý úshin úıinen shyqqan. Osy kezde úıden órt shyǵyp, 4 balanyń ómirin jalmady. Balalardyń jasy 8, 6, 4, 2-de bolǵan.
«KOSTENKO» SHAHTASYNDAǴY ÓRT
28 qazanda «Arselor Mıttal Temirtaý» AQ-nyń Kostenko atyndaǵy kómir shahtalarynda joıqyn jarylys bolyp, saldarynan 46 adam qaza taýyp, 28 kenshi jaraqat alǵan edi. Osy oqıǵadan keıin Qazaqstan bıligi «Arselor MıttalTemirtaý» kompanıasyn sheteldik ınvestordan satyp alyp, qazaqstandyq ınvestorǵa tapsyrdy. Bul kelisimdi Qazaqstan Úkimetine 286 mıllıon dollarǵa jasady. Kompanıanyń jańa ataýy «Qarmet» dep ataldy.
ALMATY HOSTELİNDEGİ ÓRT
30 qarashada Almatyda hostelderdiń birinde órt bolyp, oqıǵa ornynan 13 adamnyń denesi tabyldy. Qaza tapqandardyń toǵyzy qazaqstandyq, qalǵany sheteldikter. Memleket basshysy qaza tapqan Qazaqstannyń jáne shetel azamattarynyń jaqyndary men týǵan-týystaryna kóńil aıtty. Almaty ákimdigi jerleý rásimin uıymdastyrýǵa jáne qaza tapqandardyń denesin tasymaldaýǵa kómektesti. Órtke oranǵan hosteldiń ashylǵanyna bir jarym aı bolǵan. Ol bankterdiń birine tıesili bolǵan. Bank ony kepil-múlik retinde jalǵa bergen. Jalpy hostelde 72 adam turyp jatqan. 59 adam syrtqa shyǵyp úlgergen. QR Qylmystyq kodeksiniń 292-babyna sáıkes qylmystyq is qozǵaldy.
MUǴALİM MEN OQÝSHYLAR QAZA TAPTY
Aqtóbe oblysy Yrǵyz aýdanynda taksıge mingen 5 oqýshy men 1 muǵalim jol apatyna ushyrady. Toyota Alphard mashınasy júk kóligine soǵylǵan. Qurylys eldi mekeniniń mańynda oqýshylar otyrǵan kólik qarsy betke shyǵyp, júk kóligimen soqtyǵysty. Saldarynan 15 jáne 16 jastaǵy eki oqýshy men 25 jastaǵy mektep dırektorynyń orynbasary sol jerde jan tapsyrdy. Olar aýdan ortalyǵyna pándik olımpıadaǵa qatysýǵa bara jatqan. Jaraqat alǵan 2007 jáne 2008 jyly týǵan qyzdar men 2008 jyly týǵan er bala Yrǵyz aýylyna jetkizildi. Olar aýyr soqqy alǵan.
AVTOBÝS 3 ADAMDY BASYP KETTİ
22 jeltoqsan kúni Almatyda taǵy bir shýly oqıǵa boldy. Keshki ýaqytta 47-baǵyttaǵy qoǵamdyq kóliktiń jolaýshysy janjal shyǵaryp, rýldegi júrgizýshi áıeldi uryp, taldyrǵan. Baqylaýdan shyǵyp ketken qoǵamdyq kólik aıaldama mańynda turǵan adamdardy qaǵyp, tórt kólikpen soqtyǵysty. Oqıǵa saldarynan úsh adam qaza taýyp, taǵy 4 adam dene jaraqattaryn aldy. Olar aýrýhanaǵa jetkizildi.Qoǵamdyq kólik júrgizýshisin urǵan jigit qamaýǵa alyndy. Avtobýs júrgizýshisi aýrýhanada jatyr.