Elordada «Tatý kórshilik qarym-qatynastyń jańa kezeńi» mádenı almasý forýmy bastaldy
QR Mádenıet jáne aqparat mınıstri Aıda Balaeva Memleket basshysy Qasym-Jomart Toqaevtyń quttyqtaý hatyn oqyp berdi, dep habarlaıdy almaty-akshamy.kz.
«Qurmetti jıynǵa qatysýshylar! Sizderdi «Tatý kórshilik qarym-qatynastyń jańa kezeńi» atty qazaq-qytaı forýmynyń ashylýymen quttyqtaımyn! Bul is-shara Qytaı Halyq Respýblıkasynyń tóraǵasy Sı Szınpın myrzanyń Qazaqstanǵa memlekettik sapary sondaı-aq SHYU samıti aıasynda uıymdastyrylyp otyr. Onyń sımvoldyq máni zor», — dep jazylǵan quttyqtaý hatynda.
Prezıdent óz quttyqtaýynda qazaq-qytaı qatynasy jańa deńgeıge kóterilgenin, jan-jaqty strategıalyq seriktestigimiz jyl ótken saıyn nyǵaıyp kele jatqanyn atap ótti. Buǵan mádenı-gýmanıtarlyq baılanystardyń da yqpaly zor.
«Shyn máninde, mádenıet pen óner — elder men órkenıetterdi jalǵap turǵan altyn kópir. SHYU samıti qarsańynda eki eldiń mádenıet ortalyqtary jumysyn bastaıdy. Bul qadam qos memlekettiń ózara yqpaldastyǵyn odan ári damytýǵa jol ashady. Osy rette bilim, ǵylym, týrızm salasyndaǵy birlesken jańa jobalar qolǵa alynady. Búgin forým Qazaqstan men Qytaıdyń tatý kórshilikke negizdelgen dostyq qarym-qatynasyn nyǵaıtady dep úmittenemin», — dedi Qasym-Jomart Toqaev.
Forýmda Qazaqstan men Qytaı birlesip túsirgen «Ortaq arman» derekti lentasy jáne «Sı Szınpınniń súıikti qanatty sózderi» baǵdarlamasynyń úshinshi maýsymy tanystyryldy.
Sondaı-aq, L. N. Gýmılev atyndaǵy Eýrazıa ulttyq ýnıversıteti men Qytaı medıakorporasıasynyń ǵylymı-zertteý ınstıtýty jáne «Kazakh Tourism» UK» AQ men Qytaı medıakorporasıasynyń Eýrazıalyq búrosy yntymaqtastyq týraly memorandým almasty.