Eki el dıplomatıalyq qatynas ornaǵanyna 30 jyl tolýyn atap ótedi
15 qazanda Qazaqstan men Qyrǵyzstan arasyndaǵy dıplomatıalyq qarym-qatynastyń ornaǵanyna 30 jyl tolady, dep habarlaıdy Almaty-akshamy.kz QazAqparatqa silteme jasap.
«Bıyl 15 qazanda Qazaqstan Respýblıkasy men Qyrǵyz Respýblıkasy dıplomatıalyq qatynas ornaǵanyna 30 jyl tolýyn atap ótedi. Osy 30 jylda bizdiń elderimiz arasynda 160-tan astam qujatqa qol qoıyldy, onyń ishindegi eń mańyzdysy – 1994 jylǵy 8 sáýirdegi Máńgilik dostyq týraly shart jáne 2003 jylǵy 25 jeltoqsandaǵy Odaqtastyq qatynas týraly shart», - dedi QR Syrtqy ister mınıstrliginiń resmı ókili Aıbek Smadıarov mınıstrlikte ótken brıfıńte.
Resmı ókildiń aıtýynsha, ekijaqty baılanystyń jaı-kúıi men perspektıvalary eki eldiń memleket basshylary, úkimetteri men syrtqy saıası vedomstvolary deńgeıinde únemi talqylanady.
«Bizdiń elderimiz kóptegen halyqaralyq uıymdar sheńberinde tyǵyz ózara is-qımyl jasaıdy. Qyrǵyzstan biz úshin aımaqtaǵy negizgi saıası jáne ekonomıkalyq seriktesterdiń biri. Qazaqstan ózara is-qımyldyń barlyq aspektileri boıynsha Qyrǵyz Respýblıkasymen kópjosparly yntymaqtastyqty odan ári tereńdetýge umtylady», - dedi A. Smadıarov.