Qazaqstan men Ózbekstan áýe keńistigi arqyly ótetin jańa T916 baǵyty ashyldy. Bul Eýropa men Ońtústik-SHyǵys Azıa arasyn jalǵaıtyn qosymsha baǵyttardyń biri.
Bul baǵyt ashylǵaly Eýropadan Ońtústik-SHyǵys Azıaǵa 19 reıs jasalǵan, dep habarlaıdy almaty-akshamy.kz.
Kólik mınıstrliginiń málimetinshe, jańa baǵytpen Lufthansa Cargo (Germanıa), Cargolux (Lúksenbýrg), Cargolux Italy (Italıa), Nomad aviation (Shveısarıa), Western Global Airlines (SSHA), Aerologic Cargo Airlines (Germanıa) sıaqty avıakompanıalar reıster oryndaýda.
T916 áýe keńistigi trassasynyń jalpy uzyndyǵy 2187 shaqyrymdy quraıdy, onyń ishinde borttar 437 shaqyrym Ózbekstan Respýblıkasynyń áýe keńistigin paıdalansa, qalǵan 1750 shaqyrym Qazaqstan Respýblıkasynyń aýmaǵynyń ústimen ótedi.
Aıta ketý kerek, T916 áýe qozǵalysyna qyzmet kórsetýdiń jańa baǵyty Ózbekstan Respýblıkasynyń avıakompanıalary men aeronavıgasıalyq provaıderi – «Ýzaeronavıgasıa» MÝK usynysy boıynsha ashyldy. Bul baǵyt IKAO-nyń tańdaýly baǵyttarynyń katalogyna engizildi.
«Qazaeronavıgasıa» RMK mamandarynyń aıtýynsha, jańa áýe dálizi sheteldik avıakompanıalar úshin Qazaqstan áýe keńistiginiń tartymdylyǵyn arttyrady, sondaı-aq Ońtústik Qazaqstan áýe qozǵalysyna qyzmet kórsetý óńirlik ortalyǵynyń avıadıspecherlerine túsetin aýyrtpalyqty azaıtýǵa kómektesedi.