Almatyda Agroworld Kazakhstan kórmesi ótti.
Onyń aıasynda Qazaqstan men Nıderland aýyl sharýashylyǵyn jáne agrobıznesti damytý salalaryndaǵy máselelerdi joǵary deńgeıde talqylaý úshin resmı negizdi qamtamasyz etetin ózara túsinistik jáne birlesken aýyl sharýashylyǵy komıtetin qurý týraly Memorandýmǵa qol qoıdy, dep habarlaıdy Almaty-akshamy.kz QR aýyl sharýashylyǵy mınıstriligine silteme jasap.
QR Aýyl sharýashylyǵy vıse-mınıstri Azat Sultanov qurylǵan komıtettiń negizgi erejelerin aıtty. Osylaısha, Qazaqstan men Nıderland ókilderi jyl saıyn kezdesip, AÓK salasyndaǵy birlesken jobalardy odan ári iske asyrý úshin bıznes ókilderi men mamandardy otyrystarǵa shaqyratyn bolady.
«Nıderland Koróldigimen aýyl sharýashylyǵynda yntymaqtastyq biz úshin basym baǵyttardyń biri jáne bul salanyń áleýeti úlken. QR Aýyl sharýashylyǵy mınıstrligi saladaǵy ekijaqty yntymaqtastyqty keńeıtýge jáne taýar aınalymy kólemin ulǵaıtýǵa múddeli. Qazaqstannyń sapaly jáne ekologıalyq taza aýyl sharýashylyǵy ónimderin óndirýge jáne eksporttaýǵa múmkindigi zor», - dep atap ótti Azat Sultanov.
Onyń aıtýynsha, 2023 jyldyń toǵyz aıynda memleketter arasyndaǵy aýyl sharýashylyǵy taýarlarynyń aınalymy 61,7 mln dollardy qurady. Bul 2022 jyldyń sáıkes kezeńimen (46,6 mln dollar) salystyrǵanda 32,4%-ǵa artyq. Azat Sultanov nıderlandtyq áriptesterine Qazaqstan azyq-túlik qaýipsizdiginiń jahandyq ındeksinde 113 eldiń arasynda 32-shi orynda turǵanyn jáne postkeńestik memleketter arasynda kóshbasshy ekenin aıtty. Qazaqstannyń jaqyn jáne alys naryqtar úshin azyq-túlik jetkizýshisi bolýǵa áleýeti jetkilikti.
Budan ári vıse-mınıstr memorandým aıasynda yntymaqtastyq jónindegi qazaqstandyq taraptyń usynystaryn aıtty. Birinshisi – ǵylym men bilim salasyndaǵy yntymaqtastyqty jandandyrý. Azat Sultanov ýnıversıtetter arasynda stýdenttermen almasý baǵdarlamasyn uıymdastyrýdy, sondaı-aq qazaqstandyq stýdentter men mamandarǵa Nıderlandynyń agrarlyq ýnıversıtetterinde oqýǵa birlesken granttar bólýdi usyndy.
«Ekinshisi – veterınarıa salasy boıynsha tájirıbe almasý jumystaryn jandandyrý. Nıderlandtyq Royal GD veterınarlyq kompanıasynan janýarlar aýrýlarynyń aldyn alý jáne emdeý jolyndaǵy jobany júzege asyrýǵa daıyndyq týraly usynys tústi. Ol qazaqstandyq tájirıbeni zerdeleýdi jáne ony jetildirý boıynsha usynystar ázirleýdi kózdeıdi», -dedi vıse-mınıstr.
Úshinshi usynys – Qazaqstanda tuqym sharýashylyǵyn damytý. Nıderlandynyń baı tájirıbesin eskere otyryp, daqyldardyń tuqymyn keń aýqymda óndirýde Qazaqstannyń aýyl sharýashylyǵy salasyn zertteý tıimdi bolady. Sondyqtan Azat Sultanov komıtetten Nıderlandynyń tarıhı tájirıbesi týraly taldamalyq aqparat jiberý múmkindigin qarastyrýdy surady.
«Qazaqstannyń aýyl sharýashylyǵy mınıstrligi joǵaryda atalǵan barlyq baǵyttar boıynsha nıderlandtyq áriptestermen belsendi ózara is-qımyl jasasýǵa daıyn. Búgingi otyrysta qol jetkizilgen ýaǵdalastyqtar eki eldiń aýyl sharýashylyǵy salasyndaǵy yntymaqtastyǵyn odan ári damytýǵa yqpal etetinine senimdimin», - dep túıindedi sózin vıse-mınıstr.