2 qarashadan bastap elimizdiń barlyq kınoteatrynda - memleket qaýipsizdigi men el turǵyndarynyń ómirine asa qater tóndiretin qylmystarǵa qarsy jedel áreket etetin «Búrkit» arnaıy jasaǵy týraly fılm prokatqa shyqty.
Kınokartına Mádenıet jáne aqparat mınıstrliginiń tapsyrysymen Ulttyq kınony qoldaý memlekettik ortalyǵynyń qarjylandyrýymen túsirilgen, dep habarlaıdy Almaty-akshamy.kz.
Keshe Almatyda fılmniń resmı tusaýkeseri ótti. Sharaǵa áskerı shendiler, tanymal shoý-bıznes ókilderi, jýrnalıser jáne basqa da qonaqtar qatysty. Kórsetilimdi Kınoortalyqtyń basqarma tóraǵasy Qurmanbek Jumaǵalı ashty.
«Bizdiń Ortalyq kórermenge oı salar sapaly jáne qyzyqty fılmderdiń ekranǵa shyǵýyna múddeli. Qazir memlekettik qoldaýǵa ıe bolatyn kınojobalardy qarjylandyrý mehnızmderin jetildirý, konkýrsty barynsha ashyq jáne ádil ótkizý, kınematografısterge túsinikti erejeler jasaý baǵytynda jumystar júrgizip jatyrmyz. Bunyń barlyǵy mınıstrimiz Aıda Ǵalymqyzynyń jeke qadaǵalaýynda», -dep atap ótti Qurmanbek Jumaǵalı.
Ulttyq kınony qoldaý memlekettik ortalyǵy basqarma tóraǵasynyń aıtýynsha, qazirgi kórermenderdiń suranys, talǵamy jan-jaqty. Sondyqtan, kórermenge ártúrli janrdaǵy, osyndaı túrli trúkqa toly ekshn fılmderdi de usynǵan jón. Fılmde «Búrkit» arnaıy jasaǵynyń sarbazdary «kúreń beret» kıý quqyna ıe bolý úshin synǵa túsedi.
«Elimizde búgingi kúnge 200-ge jýyq "kúreń beret" ıegeri bar eken. Kúreń beret kıý mártebesine arnalǵan biliktilik synaǵynan ótý – jaýyngerlik rýhtyń belgisi. Sondyqtan, jańa fılmimiz jastardy Otanǵa degen adaldyq pen rıasyz mahabbatqa tárbıeleıdi dep senemiz» - dedi Qurmanbek Jumaǵalı.
Fılmniń rejıseri – Danıar Ibragımov, ol úshin bul kartına debúttik jumys. Buǵan deıin Danıar «Qazbat» jáne «Altynshy beket» áskerı fılmderinde prodúser retinde qyzmet etken. Sol sebepti, tájirıbeli maman týyndyny túsirý oǵan qıyndyq týdyrmaǵanyn aıtty.
Fılmge Dáýren Serǵazın, Sanjar Mádı, Asylhan Tólepov, Gúlnáz Jolanova, Ásel Saǵatova, Jandos Aıbasov jáne Azamat Satybaldy syndy elimizdiń tanymal akterleri tústi. Sonymen birge tanymal mýzykant Ǵalymjan Moldanazar da antagonıst keıipkerdiń rólin somdap shyqty. Basty róldegi akterler túsirilim jumystaryna kirispes buryn birneshe apta boıy jaýyngerlik oqý-jattyǵýlaryna qatysyp, taktıkalardy úırendi.
«Fılmge túsý úshin biz arnaıy normatıvterdi tapsyrdyq. Shynaıy sarzbazdardan esh aıyrmashylyǵymyz bolmady. 30 keliden aýyr formany kıip júrdik. Bir epızodtyń túsirilimi kezinde arqamdy ońbaı jaraqattap aldym. Bir apta boıy em alýyma týra keldi. Ózim kaskader bolǵandyqtan – barlyq trúkterdi ózim jasaýǵa tyrystym» - deıdi fılm akteri Sanjar Mádı.
Bul kınonyń túsirilimine arnaıy jasaq, áskerı tehnıka jáne avıasıa, sondaı-aq eki júzden astam belsendi áskerı qyzmetshi qatysqan. Jedel-izdestirý sharalary arqaý bolǵan kartınanyń keıbir epızodtary shynaıy oqıǵalarǵa negizdelgen. Túsirilim jumystary Almaty oblysynyń kórikti jerlerinde, Qonaev qalasynda, Esik kóliniń taýlarynda jáne İle ózeninde ótti.
«Burkit» ekshn fılmi 2 qarashadan bastap barlyq kınoteatrlarda qazaq jáne orys tilderinde shyǵady.