Qytaıda Azıa para oıyndary aıaqtaldy. Onyń qatysýshylary men júldegerleri Almatyǵa oraldy. Sportshylarǵa arnalǵan alǵashqy resmı baspasóz máslıhatyn Óńirlik komýnıkasıalar qyzmeti uıymdastyrdy.
Esterińizge sala keteıik, 2023 jyldyń 22-28 qazan aralyǵynda Hanchjoýda (Qytaı) IV Azıa para oıyndar ótti. «Almaty» sport klýbynyń toǵyz sportshysy Ulttyq qurama sapynda jeńil atletıka, para taekvondo, para sadaq atý, para velosport, para júzý, para dzúdo boıynsha jarystarǵa qatysty, dep habarlaıdy Almaty-akshamy.kz.
Kórý qaıýileti buzylǵan sportshy, para velosıpedshi Kenjeǵul Seıitjan ushqysh Anton Lavrentevpen juptasyp, 18,5 jáne 69,5 km qashyqtyqta 2 qola medal jeńip aldy.
Para dzúdoshy, halyqaralyq dárejedegi sport sheberi Kamıla Dosmalova kúmis medal aldy. Para júzýshi Kırıll Ilúkevıch óziniń jeke nátıjesin edáýir jaqsartty, biraq 100 m erkin júzý stılinde ýaqyt jaǵynan azdaǵan sekýndttarǵa qalyp, 4-shi orynǵa ıe boldy.
Jarysqa elimizden barlyǵy 131 sportshy 14 sport túrine qatysyp, segiz altyn, 12 kúmis jáne 21 qola medalmen komandalyq esepte 11-orynǵa ıe boldy. Aıta ketý kerek, Azıa para oıyndaryna 43 eldiń sportshylary qatysty.
Sportshylar Qytaı sapary men ózderiniń sportqa qalaı kelgenderi jaıly aıtyp berdi. Aıta keteıik, jattyqtyrýshylar da, sportshylardyń ózderi de Azıa oıyndary joǵary deńgeıde ótkenin atap ótti. Barlyq parasportshylar oǵan uzaq jáne baryn salyp daıyndaldy, memlekettik organdar da qoldaý kórsetti.
«Biz Azıa oıyndarynyń aldynda Almaty oblysynda jáne orta taýly aımaqta Ystyqkólde eki jattyǵý jıynyn ótkizdik. Sondaı-aq, Qytaıda akklımatızasıadan ótýge ýaqyt bólindi. Shetinen myqty komandalar keldi, Qytaı komandasy, sondaı - aq Ońtústik Koreıa, Indonezıa quramalary kúsheıe túsken», - dep bólisti velosport quramasynyń bas bapkeri Nıkolaı Zaısev.
Ol sondaı-aq velosıpedter satyp alynǵanyn, bizdiń sportshylarymyz baryp, medal jeńip alýy úshin barynsha jaǵdaı jasalǵanyn aıtty. Aıta keteıik, búginde Almatyda para velosport damyp keledi, jattyǵýlar smart stanoktarda ótýde. Jaqynda «Halyq arenada» velo baza ashylady, sonymen qatar «Endúrans» fıtnes-zalynda sabaqtar ótedi.
Ótken jarystardan alǵan áserimen 2023 jylǵy taekvondodan Azıa para oıyndarynyń kúmis júldegeri Kamıla Dosmalova bólisti. Ol sportpen mektepte oqyp júrgen kezinen aınalysqan.
«Men sportpen salaýatty ómir saltyn ustaný úshin hobbı retinde aınalysa bastadym. 2016 jyly jattyqtyrýshy maǵan jarysqa qatysý múmkindigi týraly aıtty. Men beldesý alańyna alǵash ret m 2016 jyly Azıa chempıonatynda shyqqan bolatynmyn», - dep bólisti ol.
Azıa para oıyndarynda jartylaı fınalda dzúdoshy sparrıngte Nepal ókilderimen kezdesti.
Velosport boıynsha 2023 jylǵy Azıa para oıyndarynyń qatysýshysy, sport sheberi Juldyz Qaınarova jyl boıy kásibı túrde para velosportpen aınalysady. Seksıaǵa 2021 jyly ózin synap kórý úshin kelgen, sol kezden bastap Juldyz jarysqa qatysa bastady, tipti birinshi oryndardy ıelengen.
Velosporttan 2023 jylǵy Azıa para oıyndarynyń qola júldegeri, sport sheberi Anton Lavrentev jarysta ushqysh rólin atqarady. Ol 10 jasynan bastap velosportpen aınalysa bastapty, onyń ákesi jattyqtyrýshylyqpen aınalysady. Anton halyqaralyq jáne eýropalyq starttarǵa qatysyp, qurlyqtyq komandalardyń quramynda boldy. Sodan keıin ol 2023 jylǵy Azıa para oıyndarynyń qola júldegeri Kenjeǵul Seıitjanmen birge para velosportta ózin ushqysh retinde synap kórdi.
Antonnyń seriktesi - Kenjeǵul Seıitjan zaǵıp sportshylar úshin ushqyshtar erkindikti, jyldamdyqty, ushýdy sezinýge múmkindik beretin adamdar ekenin aıtty. Kenjeǵul para velosporttan Qazaqstan Federasıasyn qurý ıdeıasy sonaý 80-shi jyldary bastalǵanyn aıtty.
«Bul týraly estigennen keıin men shabyttandym jáne elimizde osy sportty damytqym keldi. Sondyqtan 2016 jyly biz «Shekarasyz sport» jobasyn qurdyq, álemniń jartysyn aralap, jarysqa qatysatyn kez keldi dep sheshtik. Sonymen, 2021 jyldan bastap biz ár túrli týrnırler men jarystarǵa jıi qatysyp, federasıany nyǵaıtyp, keńeıtý kerek degen sheshim qabyldadyq. Sol jyly biz velosporttan qysqy jáne jazǵy ulttyq chempıonattardy ótkize bastadyq. 2022 jyly para velosporttan QR Ulttyq chempıonatynda komandaǵa on eki ushqysh kirdi, sol jyldyń naýryz aıynda Maqsat Qadyrov ekeýmiz komandadan baryp, para velosporttan alǵashqy qola medal alyp keldik», - dep bólisti ol.
Baspasóz máslıhatynyń sońynda para sportshylar men olardyń jattyqtyrýshylary erekshe qajettilikteri bar adamdardy seksıaǵa kelýge, ózderiniń qataryna qosylyp, sporttaǵy bıikterge jetýge shaqyrdy.