Qazaqstan Syrtqy ister mınıstriniń orynbasary Álibek Baqaev EO Eýropalyq syrtqy is-qımyl qyzmeti basqarýshy dırektorynyń Reseı, Shyǵys áriptestigi, Ortalyq Azıa jáne EQYU jónindegi orynbasary Lúk Devınmen, sondaı-aq EO Kóshi-qon jáne ishki ister departamenti Bas dırektorynyń orynbasary Iohannes Lýhnermen kelissózder júrgizdi.
Kelissózder barysynda taraptar Qazaqstan men Eýropalyq odaqtyń saıası jáne saýda-ekonomıkalyq yntymaqtastyǵyn, zań ústemdigi men adam quqyqtary, kólik, energetıka, klımattyń ózgerýine qarsy kúres, qorshaǵan ortany qorǵaý, bilim jáne ǵylym salalaryndaǵy ózara is-qımyldy, sondaı-aq QR men EO arasyndaǵy Keńeıtilgen áriptestik pen yntymaqtastyq týraly kelisimdi iske asyrýdy talqylady, dep habarlaıdy almaty-akshamy.kz
Qazaqstan azamattary úshin EO vızalyq rejımin jeńildetý máselesine erekshe nazar aýdaryldy. QR Syrtqy ister mınıstriniń orynbasary elimiz Eýropa elderi úshin vızasyz rejımdi engizý boıynsha birjaqty qadamdar jasaǵanyn aıtyp, qazaqstandyq qoǵam shengen vızalaryn alýdy jeńildetetin jaýap sharalaryn kútetinin atap ótti. Ol bul máseleni tez arada sheshýge úmit bildirdi.
Sonymen qatar dıplomattar óńirlik qaýipsizdik jáne Aýǵanstandaǵy qazirgi jaǵdaı týraly pikir almasty. Qazaq dıplomaty ú.j. 30 maýsym - 1 shilde aralyǵynda Dohada BUU uıymdastyrǵan Aýǵanstan boıynsha Arnaıy ókilderdiń úshinshi kezdesýiniń, sondaı-aq EO-nyń Aýǵanstan boıynsha Arnaıy ókili Tomas Nıklassonmen kelissózderdiń nátıjelerimen bólisti.
Jalpy, taraptar Qazaqstan men Eýroodaqtyń barlyq baǵyttar boıynsha ózara is-qımyl deńgeıine qanaǵattanýshylyqtaryn bildirip, yntymaqtastyqtyń aldaǵy josparlaryn aıqyndady.