Saýda-ekonomıkalyq ózara is-qımyl, energetıka, aýyl sharýashylyǵy jáne «jasyl» ekonomıka salasyndaǵy seriktestik.
Qazaqstan men EO osy salalardaǵy yntymaqtastyqty ári qaraı jalǵastyrmaq. Sondaı-aq Brússelde Qasym-Jomart Toqaevtyń bastamasymen elimizde júzege asyrylyp jatqan áleýmettik-ekonomıkalyq jáne saıası reformalarǵa oń baǵa berildi, dep habarlaıdy Almaty-akshamy.kz
Bul jóninde Eýrokomıssıa jáne Eýropalyq keńes ókilderimen ótken eki kúndik kelissózder nátıjesinde belgili boldy. Taraptar EO-nyń kórshi Reseıge salǵan sanksıalarynyń respýblıkaǵa yqtımal áseri týraly sóz etti. Brússel Qazaqstannyń alańdaýshylyǵyn tolyq túsinetinin aıtyp, bul máselede barynsha qoldaý kórsetýge daıyn ekenin málimdedi.
«Qazaqstan EO-nyń kóptegen eline munaıdyń úlken kólemin jetkizip otyr. Ásirese bizdiń kópvektorly munaı qubyry strategıasy saıasatynyń kontekstinde Qazaqstannyń tranzıttik-kóliktik áleýetin damytý máselesin talqylaý biz úshin óte mańyzdy ekenin atap ótkim keledi. Qazaqstan teńizge shyǵa almaıtyn iri memleket bolǵandyqtan, tranzıttik kórshilerine táýeldi. Biz ózge memleketke táýeldilikti azaıtyp, halyqaralyq naryqqa barynsha kóbirek qol jetkizgimiz keledi. Máselen, «orta dáliz» dep atalatyn Transkaspıı baǵyty týraly aıtýǵa bolady. Ózderińiz biletindeı, elimiz Iran, Qytaı baǵytyn paıdalanady. Sondaı-aq burynǵydaı soltústik baǵytty da paıdalana alady dep senemiz», - deıdi Qazaqstan Respýblıkasy Prezıdentiniń halyqaralyq yntymaqtastyq jónindegi arnaýly ókili Erjan Qazyhanov.