Qar kóshkini jáne sý tasqyny bolýy múmkin.
Qazaqstannyń Tótenshe jaǵdaılar mınıstri Iýrıı Ilın elimizde sý basý qaýpi bar óńirlerdi atady, dep habarlaıdy Almaty-akshamy.kz QazAqparatqa silteme jasap.
«Aqmola, Aqtóbe, Shyǵys Qazaqstan, Batys Qazaqstan, Soltústik Qazaqstan, Qaraǵandy, Qostanaı jáne Pavlodar oblysynda taıaýdaǵy aptada kún kúrt jylıdy dep kútilýde. Sáıkesinshe, bul qardyń erýi men seń júrýge yqpal etedi. Osy oraıda joǵaryda atalǵan óńirlerge qarasty 157 eldi mekendi sý basý qaýpi bar», - dedi Iýrıı Ilın Ortalyq komýnıkasıalar qyzmeti alańynda ótken baspasóz máslıhatynda.
Sondaı-aq, mınıstr elimizdiń ońtústik óńirindegi jaǵdaıǵa toqtalyp ótti.
«Sonymen qatar Túrkistan oblysynyń ońtústigi men taý bókteri aýdandarynda, Jambyl oblysynyń soltústik-shyǵysynda, ońtústiginde, taýly aýdandarynda, sol sıaqty Almaty oblysynyń ońtústiginde jáne taýly aýdandarynda qatty jaýyn-shashyn kútilýde. Osyǵan baılanysty joǵaryda atalǵan óńirlerde qar kóshkini jáne sý tasqyny bolýy múmkin», - deıdi ol.
Vedomstvo basshysynyń aıtýynsha, aýa raıynyń qolaısyzdyǵy saldarynan bolatyn tótenshe jaǵdaıdyń aldyn alý sharalary kúndelikti júrip jatyr jáne baqylaýda.