Jerdi qashyqtyqtan zondtaýdyń ǵaryshtyq júıesi kórsetildi
Astanada áskerı topografıa, geodezıa, kartografıa jáne navıgasıa máseleleri boıynsha Qazaqstan men Belarýs qorǵanys vedomstvolarynyń qyzmetteri arasynda jumys kezdesýi ótti, dep habarlaıdy Almaty-akshamy.kz.
Eki kún boıy áriptester jergilikti jer týraly jáne kartografıalyq, áskerlerdi jaýyngerlik qamtamasyz etý júıesinde bilimdi is júzinde qoldaný týraly aqparat berý salasynda tájirıbe almasty. Taraptar odan basqa basqarý organdarynyń sheshimin qabyldaýdy qoldaý júıesine arnaıy tehnıka men geoaqparattyq tehnologıalardyń perspektıvalyq úlgilerin jobalaý, qurý jáne engizý máselelerin talqylady.
Belarýs armıasynyń atynan Qarýly kúshterdiń navıgasıalyq-topografıalyq qyzmetiniń bastyǵy – RB QK Bas shtabynyń navıgasıalyq-topografıalyq basqarmasynyń bastyǵy polkovnık Alekseı Bakanov qazaqstandyq taraptyń shaqyrýymen kelgenin atap ótti.
– Jumys kezdesýi barysynda biz áskerlerdi jergilikti jer týraly zamanaýı aqparatpen qamtamasyz etý tártibiniń máselelerin qarastyrdyq, jergilikti jer týraly aqparatty qamtamasyz etý jáne jasaý boıynsha baǵdarlamalyq aparattyq quraldardyń qalaı qoldanylatynyn talqyladyq. Shara alǵash ret Qazaqstan aýmaǵynda ótip otyr. Mundaı ózara is-qımyl osyndaı qyzmetti damytý úshin nátıjesin beredi dep oılaımyn, – deıdi QR QK Bas shtabynyń Geoaqparattyq qamtamasyz etý departamentiniń bastyǵy polkovnık Serik Joldybaev.
Belarýs delegasıasy Tuńǵysh Prezıdent atyndaǵy Ulttyq qorǵanys ýnıversıtetinde boldy. «Qazaqstan Ǵarysh Sapary «Ulttyq kompanıasy» aksıonerlik qoǵamynda belarýs elinen kelgen qonaqtarǵa Jerdi qashyqtyqtan zondtaýdyń ǵaryshtyq júıesi kórsetildi. Al Astana IT University delegasıa múshelerine Qazaqstan Respýblıkasynda geoaqparattyq qamtamasyz etý kadrlaryn daıarlaýdyń oqý prosesin kórsetti. Ulttyq geodezıa jáne keńistiktik aqparat ortalyǵynda belarýs áskerıleri Qazaqstan Respýblıkasyndaǵy topografıalyq-geodezıalyq jáne kartografıalyq ónimmen tanysty.