Jetisý oblysynyń "Kóktal" polıgonynda "Altyn qyran-2024" halyqaralyq taktıkalyq-arnaıy oqý-jattyǵýy aıaqtaldy.
Belsendi kezeń barysynda qazaqstandyq desantshylar men Ázerbaıjan armıasynyń áskerı qyzmetshilerinen quralǵan birikken jasaq zańsyz qarýly quralymnyń avtomobıl tehnıkasynyń legine tosqaýyl uıymdastyrdy, dep habarlaıdy aqshamnews.kz
İs-qımyldyń praktıkalyq kezeńin Qazaqstan men Ázerbaıjan qarýly kúshteri bas shtabtarynyń bastyqtary general-leıtenant Sultan Kamaletdınov pen general-polkovnık Kerim Velıev qadaǵalady.
Eki el qarýly kúshteri basshylyǵynyń nazary barlaý jasaqtarynyń áreketterine, basyp alý jáne atyspen qamtamasyz etý toptaryna jáne ushqyshsyz ushý apparattary arqyly barlaý deregin alý algorıtmine aýdaryldy.
Oqý-jattyǵý barysynda kontıngentterdi úılestirý joǵary deńgeıge jetti. Birikken barlaý jasaǵynyń komandıri qarsylas ótedi degen barlyq baǵyttardy taldap, avtomobıl kóligi júrýi qıyn bolatyn aımaqty tańdap, atys núkteleriniń ornalasýy men olardy jasyrý máselelerin pysyqtady. Qabyldanǵan sheshimderdiń durystyǵy uıymdasqan tosqaýyldyń tıimdi jáne tapsyrmanyń naqty oryndalýyn qamtamasyz etti.
"Altyn qyran-2024" halyqaralyq taktıkalyq-arnaıy oqý-jattyǵýy taýly-shóldi jerlerde arnaıy barlaý is-qımyldaryn kórsetýmen aıaqtaldy. Biz komandalyq quramnyń daıarlyǵynyń, áskerı qyzmetshilerdiń dene daıyndyǵynyń, eki eldiń kontıngenti arasyndaǵy ózara is-qımyl deńgeıiniń joǵary ekenine kóz jetkizdik. Bólimshe komandırleri óte qysqa merzimde birtutas organızm retinde áreket etken jeke quramnyń úılesimdiligine qol jetkizdi. Buǵan oqý-jattyǵýdyń barlyq kezeńinde qazaqstandyq jáne ázerbaıjandyq áskerı qyzmetshilermen qatar mindetterdi atqarǵan birikken jasaqtardyń arqasynda qol jetkizildi, – dep atap ótti oqý-jattyǵý jetekshisi Qazaqstan Respýblıkasy Qarýly kúshteri Desanttyq-shabýyldaý áskerleriniń qolbasshysy general-maıor Almaz Jumakeev.
Belsendi kezeńnen keıin birden oqý-jattyǵýdyń jabylý saltanaty ótti, onda erekshe kózge túsken áskerı qyzmetshiler eki eldiń áskerı kontıngentteri qolbasshylyǵynyń alǵys hattarymen marapattaldy.