QR Qarýly kúshteri Ulttyq áskerı-patrıottyq ortalyǵy «Jas sarbaz» balalar stýdıasynyń bı ujymy Kókshetaý qalasynda ótken Ulttyq Delfıı oıyndarynda joǵary marapatqa ıe boldy.
Delfıı oıyndaryna 600 jas daryn qatysty. Qazylar alqasynyń tarazysyna 20 horeografıalyq ujymnyń kompozısıalary usynyldy. Olardyń ishinde 8 jastan 10 jasqa deıingi sanatta «Jas sarbaz» balalar stýdıasynyń bı toby «Halyq bıi» nomınasıasynda «altyn» júlde enshiledi, dep habarlaıdy aqshamnews.kz Qorǵanys mınıstrligine silteme jasap.
Jas bıshiler shyǵarmashylyq baıqaýǵa pedagog-horeograf, úshinshi synypty serjant Almıra Asylbekova men qoıýshy-horeograf, Qarýly kúshterdiń qyzmetkeri Erjan Qudaıbergenovtyń basshylyǵymen muqıat daıyndaldy.
– Balalardyń bımen aınalysqanyna nebári eki jyl. Sonyń ózinde Qyrǵyzstandaǵy «Náreste» halyqaralyq fólklorlyq festıvalinde Qazaqstannyń atynan óner kórsetti. Endi Bishkekte ótetin Halyqaralyq Delfıı oıyndaryna barady. Bul jetistik, árıne, bárimizdi shabyttandyryp, qýantty. Qorǵanys mınıstrliginiń basshylyǵyna jáne tárbıelenýshilerimizdiń shyǵarmashylyq áleýetin damytýǵa úlken úles qosqan ata-analaryna rahmet, – dedi balalar stýdıasynyń jetekshisi Almıra Asylbekova.
Ótken jeksenbide baıqaý jeńimpazdaryn áskerı orkestr qarsy aldy. Jas bıshilerdi quttyqtaýǵa UÁPO basshylyǵynyń ókilderi, oqýshylardyń ata-analary men dostary keldi.