Syrtqy ister mınıstriniń orynbasary Nazıra Nurbaeva «Jahandyq ınfraqurylym jáne ınvestısıalyq seriktestik» baǵdarlamasynyń AQSH-tyń arnaıy úılestirýshisiniń mindetin atqarýshy Helaına Masamen kezdesti.
Kezdesýde taraptar kólik-logıstıka, taza energıa, aýyl sharýashylyǵy ónimderin, sırek jer metaldaryn óndirý jáne óńdeý salalaryndaǵy jobalarǵa ınvestısıa salý múmkindikterin talqylady, dep habarlaıdy almaty-akshamy.kz Syrtqy ister mınıstrligine silteme jasap.
G7 «Jahandyq ınfraqurylym jáne ınvestısıalyq seriktestik» baǵdarlamasy damýshy elderdegi ınfraqurylymdyq jobalarǵa 2027 jylǵa qaraı 600 mıllıard AQSH dollaryn ınvestısıa salýdy kózdeıdi.
Suhbat barysynda N.Nurbaeva Qazaqstannyń kólik ınfraqurylymyn, onyń ishinde Aqtaý jáne Quryq teńiz porttary arqyly damytý, taza energıa óndirý, mańyzdy paıdaly qazbalar men aýyl sharýashylyǵy ónimderin óndirý salalaryndaǵy jobalardy iske asyrý perspektıvalary týraly aıtyp berdi. Mınıstrdiń orynbasary Ortalyq Azıa óńiriniń osy salalardaǵy uzaq merzimdi seriktestik úshin zor áleýeti bar ekenin atap ótip, Qazaqstannyń ortaq maqsattarǵa jetý úshin AQSH-pen yntymaqtasýǵa daıyn ekenin bildirdi.
Óz kezeginde H.Masa «Úlken jetilik» elderi Ortalyq Azıadaǵy ınfraqurylymdyq jobalarǵa 200 mıllıard AQSH dollarǵa deıin ınvestısıa salýǵa daıyn ekenin jáne mundaı jobalardy júzege asyrýdyń negizgi baǵyttarynyń biri – Qazaqstan ekenin atap ótti. Baǵdarlamanyń negizgi maqsaty – Eýropalyq naryqtarǵa odan ári shyǵý arqyly Ortalyq Azıa elderi arasyndaǵy saýda qatynastaryn keńeıtý arqyly álemdegi azyq-túlik jáne energetıkalyq qaýipsizdikti qamtamasyz etý úshin jetkizý tizbegin nyǵaıtý jáne ártaraptandyrý.
Kezdesý sońynda taraptar mańyzdy ınfraqurylymdyq jobalardy júzege asyrý jáne ekonomıkalyq baılanystardy nyǵaıtý úshin taraptar arasyndaǵy yntymaqtastyqty damytýǵa kelisti.