Qala máslıhaty bekitken jańa normatıvtik akt quqyqtyq mártebesi men sharýashylyq qyzmet nysandaryna qaramastan zańdy tulǵalardy, sondaı-aq aýla men qoǵamdyq aýmaqtardy abattandyrýǵa jaýapty laýazymdy tulǵalardy qosa alǵanda, barlyq qala turǵyndary úshin qala aýmaqtaryn abattandyrý tártibin aıqyndaıdy.
Almatynyń komýnaldyq ınfraqurylymdy damytý basqarmasynyń basshysy Dýlat Ashkenov atap ótkendeı, megapolıste 2013 jyldan beri qoldanylmaǵan arnaıy pasporttardy paıdalaný qaıta bastalady. Qujatta trotýarlardyń, kógaldardyń, qasbetterdiń jaı-kúıine, sondaı-aq ýrnalar, pandýstar, qorshaýlar, kóshe jıhazdary sıaqty elementtermen jabdyqtaýǵa qoıylatyn talaptar bekitiledi.
Bul rette, basqarmada atap ótkendeı, qalany abattandyrý pasporty – bul ımperatıvti norma emes. Qujatqa aýdan ákimdigi men naqty kásipker eki jaqty qol qoıady. Bul rette, ol buryn kózdelmegen ýchaskelerdi abattandyrý bóliginde qosymsha shyǵyndardy kótermeıdi.
Kásipkerlerdiń qujat normalaryn saqtaýyn baqylaýdy aýdan ákimdikteri júzege asyratyn bolady, biraq olardy oryndamaǵandardy polısıa departamenti jaýapqa tartatyn bolady.
Sonymen qatar, jańa standarttarǵa sáıkes, buqaralyq is-sharalardy uıymdastyrýshylar konsertterden, festıválderden, jármeńkelerden jáne basqa da is-sharalardan keıin tazalaýǵa mindetteledi.
Jańashyldyqqa túsinikteme bere otyryp, Almaty máslıhatynyń depýtaty Sergeı Kozlov buǵan deıin qoldanysta bolǵan erejeler 2007 jyly qabyldanǵanyn, osy ýaqyt ishinde olarǵa tolyqtyrýlar men ózgerister qajet bolǵanyn atap ótti.
«Qala osy jyldar ishinde úlken jumys atqardy. Sonymen qatar, megapolıske qosymsha ýchaskeler men aýmaqtar qosyldy. Kóptegen jańa aýlalar jóndelip, jasaldy, kógaldandyrý júrgizildi, kishi sáýlet nysandary ornatyldy, jalpy demalys oryndary, sport alańdary, mektep aýlalary abattandyryldy jáne taǵy basqalar. Munyń bári bizdiń azamattarymyzdyń ál-aýqaty men jaılylyǵyna baǵyttalǵan. Biz bárimiz qalanyń taza ári jaıly bolǵanyn qalaımyz. Árıne, munyń bárin jaqsy jaǵdaıda ustaý kerek», - dep atap ótti Sergeı Kozlov.
Onyń aıtýynsha, qazirgi erejeler qalada jasalǵan jaqsy isterdiń saqtalýyna baǵyttalǵan. Engiziletin jańa ózgerister qalalyq komýnaldyq qyzmetterdiń de, bıznestiń de, qarapaıym azamattardyń da jaýapkershiligin kúsheıtedi.
«Erejede ınklúzıvti orta qurý, qalalyq sýburqaqtardyń jumysyn uıymdastyrý, úı janýarlaryn ustaý jáne serýendetý máseleleri qarastyrylǵan. Megapolıs ómiriniń barlyq aspektileri qamtylǵan. Munyń bári megapolısti damytýǵa, onyń barynsha taza ári jaıly bolýyna baǵyttalǵan. Qujat muny qalaı jasaý kerektigin jáne ony qalaı qoldaýǵa bolatynyn anyqtaıdy», - dep túıindedi qalalyq máslıhat depýtaty.
Esterińizge sala keteıik, 2024 jylǵy 19 shildede VIII saılanǵan máslıhattyń kezekten tys HHİ sesıasynda depýtattar Almaty qalasynyń aýmaǵyn abattandyrýdyń jańa erejelerin bekitti. Bul sharalar «Taza Qazaqstan» respýblıkalyq aksıasynyń maqsattaryna sáıkes keletin qaýipsiz, yńǵaıly jáne ekologıalyq qolaıly qalalyq ortany qurýǵa baǵyttalǵan.
Jańa erejelermen silteme arqyly tanysýǵa bolady https://legalacts.egov.kz/npa/view?id=15095011.