Qazaqstan Respýblıkasy halyqty koronavırýsqa qarsy vaksınalaý boıynsha Táýelsiz Memleketter Dostastyǵy elderiniń arasynda birinshi orynǵa shyqty. Bul týraly premer-mınıstr Asqar Mamın búgin buqaralyq aqparat quraldary ókilderimen ótken kezdesýinde málimdedi. Sebebi vaksınanyń birinshi komponentimen qazaqstandyqtardyń 75 paıyzy egilgen. Al tolyq kýrsynan 69 paıyzy ótip úlgerdi. Qazir elde Pfizer ekpesimen egý jumystary júrip jatyr, dep habarlaıdy Almaty.tv tilshisi.
12 qarashadan bastap eldiń ár óńirinde buryn-sońdy ımmýndalmaǵan toptar Pfizer vaksınasyn alyp jatyr.
Osy 4 táýlik ishinde tek Almaty qalasynda amerıkalyq vaksınany salǵyzǵandar sany 1152 adamǵa jetti. Bul týraly qalalyq Qoǵamdyq densaýlyq basqarmasy habarlady.
Qazir olardyń jaǵdaıy jaqsy. Eshqandaı shaǵym joq. Al el premer-mınıstri Asqar Mamın Pfizer ekpesin saldyra alatyndar tizimi ulǵaıýy múmkin ekenin aıtyp otyr. Qazir bul másele qaralyp jatyr. Al búgin megapolıste balalardy Pfizer ekpesimen mektep qabyrǵasynda egý bastaldy. Buǵan deıin vaksınalaý tek medısınalyq mekmelerde júrgizilgen edi. Qazir bilim ordalary egý jumysyna saqadaı saı. Oqýshylar tizimi jasalǵan. Jergilikti emhanalar bala sanyna sáıkes vaksına mólsherin shaqtap jetkizip jatyr.
Al qarasha aıynyń aıaǵynda vırýspen kúreste aldyńǵy shepte júrgenderdi revaksınalaý naýqany bastalady. Bul tizimge qarıalar men ımýnıteti álsiz adamdar iligip otyr. Al halyqty jappaı úshinshi márte egý kelesi jylǵa josparlanǵan. Osy rette dárigerler qant dıabeti, sozylmaly jáne gıpertonıalyq aýrýlary bar naýqastarǵa vaksınanyń kúsheıtkish dozasyn ýaqytynan keshiktirmeı alýǵa keńes berdi. Sebebi megapolıste juqpaly respıratorly vırýs órship tur. Ótken jyly bul ýaqytta tumaý juqtyrǵandar qatary 4 esege tómen edi. Sondyqtan tumaýǵa qarsy ekpe salǵyzý da artyqshylyq etpeıdi eken.
«Imýndyq júıeniń ózine ǵana tán erekshe qasıeti bar. Antıdeneler vırýspen kúresken saıyn, jasýshanyń este saqtaý qabileti kúsheıe túsedi. Iaǵnı, adam koronavırýsty nemese basqa da juqpaly vırýs juqtyrsa, ımýnıtet oǵan qarsy turýǵa tyrysady. Sondyqtan kópshilik ekpeniń úshinshi dozasy ǵana adam aǵzasyn vırýstan tolyq qorǵaıtynyn túsinýi kerek», – dedi S.J.Asfendıarov atyndaǵy QazUMÝ jalpy ımmýnologıa kafedrasynyń meńgerýshisi Elmıra Bıtanova.
El boıynsha vaksınalaý naýqany bastalǵaly 9 aı ýaqyt ótti. Osy rette Qorǵanys mınıstrligi aqpan aıynda ımmýndalǵan áskerılerdiń barlyǵy revaksınalaý naýqanyna daıyn ekenin habarlap otyr. Endi Qarýly Kúshter quramyndaǵy qyzmetkerlerge qarasha aıynyń sońynda vaksınanyń kúsheıtkish dozasy egilmek.
«Ol úshin bir ǵana doza vaksına qoldanylatyn bolady. Qarýly Kúshterdiń jeke quramy revaksınasıalaýdyń mańyzdylyǵyn jaqsy túsinedi. Óıtkeni, koronavırýs ınfeksıasynyń jańa shtamdaryna qarsy tolyqqandy daıyn bolý úshin revaksınalaý óte mańyzdy», – dedi QR QK Bas áskerı-medısınalyq basqarmasynyń bastyǵy Álibek Manabaev.
Qazir elimizde epıdahýal jaqsaryp keledi. Buǵan deıin «sary» aımaqta bolǵan Almaty qalasy demalys kúnderi «jasylǵa» ótti. Endi megapolıste bir apta boıy koronavırýstyń taralýy boıynsha jaǵdaı baqylaýda bolady. Kovıdtiń órshýi bolmaǵan jaǵdaıda birqatar shekteýler jeńildetiledi. Máselen «Ashyq» qosymshasy arqyly jumys isteıtin nysandardyń qyzmet ýaqyty taǵy eki saǵatqa uzarady. Sondaı-aq qoǵamdyq oryndarda meımandar sanyn arttyrýǵa ruqsat etiledi.