QR Premer-Mınıstri Álıhan Smaıylov Mashına jasaý salasyn damytýdyń 2028 jylǵa deıingi keshendi josparyn ázirleý máseleleri jóninde keńes ótkizdi, dep habarlaıdy Almaty-akshamy.kz primeminister.kz saıtyna silteme jasap.
Memleket basshysynyń tapsyrmasyna saı atalǵan qujat boıynsha júrgizilip jatqan jumys salanyń odan ári damýyna úlken serpin berýge tıis. Ony daıyndaý kezinde bıznestiń, atap aıtqanda, Qazaqstan mashına jasaýshylar odaǵynyń usynystary eskerildi.
Keshendi jospar otandyq óndirýshilerdi qoldaýǵa jáne mashına jasaý salasynyń básekege qabilettiligin arttyrýǵa baǵyttalǵan 83 is-sharany qamtıdy. Onda jalpy júıelik, sondaı-aq sektorlar boıynsha naqty sharalar (taý-ken metalýrgıasy, temirjol, munaı-gaz, energetıka, elektr tehnıkasy, aýyl sharýashylyǵy mashınasyn jasaý, avtomobıl jasaý, áýe kemelerin jasaý) aıqyndalǵan.
Jospardyń negizgi maqsaty – mashına jasaý salasyndaǵy jalpy qosylǵan qunnyń 4,5 ese, óndiris kóleminiń 2,2 ese, eksporttyń 2,9 ese, eńbek ónimdiliginiń 1,9 ese, ınvestısıalardyń 1,5 esege ósýin qamtamasyz etý.
Qujatty talqylaý qorytyndysy boıynsha Álıhan Smaıylov Indýstrıa jáne ınfraqurylymdyq damý mınıstrligine múddeli memlekettik organdarmen jáne uıymdarmen birlesip, Keshendi jospardy kelisýdi jáne ony bekitý týraly Úkimet qaýlysynyń jobasyn engizýdi jedeldetýdi tapsyrdy.