Bul halyqaralyq konkýrsqa Qazaqstannan buryn sońdy eshkim qatyspaǵan.
Mańǵystaýlyq «Jeti laq» fermasy Mondial du fromage-2023 halyqaralyq irimshik baıqaýyna qatysady, dep habarlaıdy Almaty-akshamy.kz
Mańǵystaý oblysy ákiminiń baspasóz qyzmetiniń aqparatyna saı, qazaqstandyqtar konkýrs uıymdastyrýshylarynan alǵash ret akredıtasıa aldy.
2020 jyldan bastap jumys isteıtin «Jeti laq» fermasy Túpqaraǵan aýdanyndaǵy Aqshuqyr aýylynda ornalasqan.
Kásipkerler pasterlengen eshki sútin, ıogýrt, aıran, súzbe, qaımaq jáne irimshiktiń 12 túrin shyǵarady.
Kobzevter otbasy aıyna 3,5 tonna eshki sútin óndiredi. Ferma 10 ga jerdi alyp jatyr, onyń tórt gektary eshki ósirýge arnalsa, qalǵan aımaqta jem-shóp qoımasy men sút óńdeý sehy ornalasqan.
«Bıyl biz óndiristi damytýǵa baǵyttalǵan qaıtarymsyz 5 mln teńge grant utyp aldyq. Sonymen qatar, «Aýyl amanaty» baǵdarlamalarynyń qatysýshylarymyz. Aýyl sharýashylyǵy kásipornyn óz aqshańa damytý óte qıyn, osy turǵyda memleket aýyl sharýashylyǵy óndirýshilerine kóńil bólip, qoldaý kórsetip otyrǵany qýantady. Bıylǵy jyly biz úshin mańyzdy oqıǵa Mondial du fromage-2023 halyqaralyq irimshik baıqaýyna qatysý. Onda biz óz ónimderimizdi tanystyramyz. Aıta ketý kerek, elimiz táýelsizdik alǵaly beri Qazaqstan alǵash ret álemdik irimshik jasaýshylar baıqaýyna óz ónimderin usynatyn bolady», - dedi irimshik daıyndaýshy Aleksandra Grıgolova.
Fransýzdyq Le Mondial du fromage baıqaýy qyrkúıek aıynyń 10-12 aralyǵynda Týr qalasynda ótedi.
Eýropada ótetin bul halyqaralyq is-shara - sút ónimderin shyǵarýshy kásipkerlerdiń óz ónimderin usyna alatyn joǵary deńgeıdegi alań.