QR Qarýly Kúshteri Desanttyq-shabýyldaý áskerleri 16194 áskerı bóliminiń órt sóndirý eseptoby shuǵyl túrde órtti aýyzdyqtady, dep habarlaıdy Almaty-akshamy.kz.
Órt áskerı qalashyqtaǵy garajdarda boldy. Qyzyl jalyndy patrúl quramynda áskerı bólimniń aýmaǵyn aınalyp ótken efreıtor Áltaır Muhamedsalımov baıqady. Áskerı qyzmetshi birden kezekshige baıandap, keıin oqıǵa ornyna órt sóndirýshiler eseptoby kelip jetti.
Serjant Baqytjan Qalıdoldaevtyń basshylyǵymen quramynda 10 adamy bar órt sóndirýshiler toby jarty saǵat ishinde jalyndy aýyzdyqtady. Oryn alǵan oqıǵany jeldiń ekpini qıyndatty, sonyń saldarynan órt kórshi ǵımarattarǵa da taralýy múmkin edi.
– Negizinen bul garajdardy áskerı qalashyq turǵyndary qoıma retinde paıdalanady. Biz órt turǵyn úılerge nemese áskerı bólimge taralmas úshin tez áreket ettik. Baqytymyzǵa oraı, eshkim zardap shekken joq, – deıdi serjant Baqytjan Qalıdoldaev.
Órtti sóndirý kezinde eseptop áskerı bólimde únemi ótkiziletin sabaqtarda alǵan barlyq bilim men daǵdylaryn paıdalandy. Jedel jáne batyl áreketteriniń arqasynda oqıǵa nátıjeli aıaqtalyp, jeke quramǵa áskerı qalashyq turǵyndary alǵysyn aıtyp, áskerı bólim komandıri polkovnık Qalı Tyqyrovtyń maqtaýyna ıe boldy.