Elimiz COVID-19 taralý qarqyny boıynsha «sary» aımaqtan «jasyl» aımaqqa ótti.
Bir aptada syrqattanýshylyq deńgeıi 30%-ǵa, vırýstyń reprodýktıvtik ındeksi 0,84-ke deıin, ınfeksıalyq tósek-oryndardyń júktelýi 24%-ǵa deıin, reanımasıalyq tósek-oryndardyń júktelýi 21%-ǵa deıin azaıǵan, dep habarlaıdy Almaty-akshamy.kz Primeminister.kz saıtyna silteme jasaı otyryp.
QR Premer-Mınıstri Asqar Mamınniń tóraǵalyǵymen ótken Úkimet otyrysynda eldegi sanıtarlyq-epıdemıologıalyq jaǵdaı qaraldy. Densaýlyq saqtaý mınıstri Alekseı Soı halyqty vaksınalaý barysy men qazirgi jaǵdaı týraly baıandady.
Qazaqstanda sanıtarlyq-epıdemıologıalyq jaǵdaıdyń jaqsarǵany baıqalady. Qazaqstan COVID-19 taralý qarqyny boıynsha «sary» aımaqtan «jasyl» aımaqqa ótti. Bir apta ishinde syrqattanýshylyq deńgeıi 30%-ǵa, vırýstyń reprodýktıvtik ındeksi 0,84-ke deıin, ınfeksıalyq tósek-oryndardyń júktelýi 24%-ǵa deıin, reanımasıalyq tósek-oryndardyń júktelýi 21%-ǵa deıin tómendedi. «Qyzyl aımaqta» Nur-Sultan qalasy, «sary aımaqta» – 6 óńir: Almaty qalasy, Atyraý, Pavlodar, Batys Qazaqstan, Aqmola jáne Qaraǵandy oblystary ornalasqan. Qalǵan 10 óńir – «jasyl aımaqta».
Búgingi tańda 2,4 mln-ǵa jýyq adam birinshi komponentti, 1,3 mln-ǵa jýyq adam ekinshi komponentti aldy. Úkimet basshysy ákimdikter men Densaýlyq saqtaý mınıstrligine jazǵy kezeńde, ásirese, Mańǵystaý, Aqmola, Qostanaı oblystary men Nur-Sultan qalasynda vaksınalaý qarqynyn barynsha arttyrýdy tapsyrdy.
«Barlyq deńgeıdegi ákimder vaksınalaý máselelerin jeke baqylaýǵa alýy tıis», — dedi Asqar Mamın.