Jastar taza eldi qoldaıdy.
Qazaqstan Úkimeti jastar arasynda ekologıalyq mádenıetti nyǵaıtýdy kózdep otyr. Osy maqsatta túrli jobalar iske asyryplyp jatyr, dep habarlaıdy Almaty-akshamy.kz.
«QR AQDM qoldaýymen ««Jas ulan» biryńǵaı balalar men jasóspirimder uıymy» respýblıkalyq qoǵamdyq birlestigi, jastar arasynda ekologıalyq mádenıetti nyǵaıtýǵa baǵyttalǵan túrli áleýmettik jobalardy iske asyrýda», - delingen Aqparat jáne qoǵamdyq damý mınıstrliginiń baspasóz qyzmetiniń habarlamasynda.
Ekologıalyq oılaýdy damytý jáne «jasyl» tájirıbeni engizý týraly jobalar jóninde «Jas ulan» tóraıymy Dınara Sádýaqasova aıtyp berdi.
«Jobanyń maqsaty – mektepter men joǵary oqý oryndarynda óskeleń urpaqqa ekologıalyq tárbıe berý. Qazirgi tańda ekologıalyq qaǵıdalardy ustaný trendke, sánge aınalýda. Úsh jyl buryn «ekobelsendi» nemese «ekologıst» sıaqty uǵymdardy eshkim qoldanǵan joq. Al qazir adamdar ózderin «ekoerikti» nemese «ekobelsendi» retinde maqtanyshpen tanystyrady. Máselen, ótken jyly biz ekoaktıvısterdiń kúshimen respýblıkanyń barlyq óńirlerinde «Estelik baǵy», «Taza ózender, kólder men toǵandar», «Taza saıabaqtar», «Óz aǵashyńdy otyrǵyz» aksıalaryn uıymdastyrdyq. Oǵan 100 myńnan astam adam qatysty», - dedi Dınara Sádýaqasova.
Budan bólek, QR AQDM bastamasymen ákimdikter, «Jas ulan» uıymy, olardyń óńirlik fılıaldary, ekovolonterler jáne jastar belsendileri birlesip, Aqtóbe, Qyzylorda, Aqmola, Almaty, Qaraǵandy, Mańǵystaý, Túrkistan oblystarynda «Kıeli tabıǵat» respýblıkalyq ekologıalyq aılyǵy aıasynda, jalpy sany 80 myńnan astam adam qatysqan «Taza saıabaqtar» aksıasy júzege asyryldy.
Sonymen qatar, ekosofıa qaǵıdattaryna negizdelgen ekologıalyq etıka men mádenıetti qalyptastyrý baǵytynda memlekettik – qazaq tilinde, jáne orys tilinde «Turmystyq qatty qaldyqtardy bólek jınaý», «Ekopıknık», «Tańbalaý», «Ekologıalyq ómirdiń 6 erejesi», «Komposttaý» taqyryptaryndaǵy onlaın-beınekýrstar ázirlendi.
Buǵan qosa, joba uıymdastyrýshylary «Eko-Asar» ekologıalyq marafonyn da ótkizdi. Marafonnyń maqsaty – eldegi TQQ bólek jınaýdyń ekologıalyq mádenıeti deńgeıin arttyrý, óńirlerdegi áleýmettik bastamalardy qoldaý.
Osy oraıda, ár aımaqta ekoaǵartýshylyq qozǵalystar qurylyp, olardyń aıasynda respýblıkanyń túkpir-túkpirinen 1000 astam ekobelsendi bilim aldy. Bul kýrstarǵa arnaıy sertıfıkattary bar ekojattyqtyrýshylar, tájirıbeli ekobelsendiler jáne eldegi ekologıalyq qozǵalystyń kóshbasshylary tartyldy.
