Táýelsizdik taqyrybynda baıandama jasaldy
Qazaqstan Respýblıkasy Táýelsizdiginiń 30 jyldyǵyn merekeleý qarsańynda «Jastar» ǵylymı-zertteý ortalyǵy QR Aqparat jáne qoǵamdyq damý mınıstrliginiń Jastar jáne otbasy isteri komıtetiniń qoldaýymen sarapshylar qoǵamdastyǵy úshin «Qazaqstan jastary – 2021: Táýelsizdikke – 30 jyl» ulttyq baıandamasynyń prezentasıasyn ótkizdi, dep habarlaıdy Almaty-akshamy.kz
Aqparat jáne qoǵamdyq damý vıse-mınıstri Asqar Ýmarov «jastardy qoldaý elimizdegi memlekettik saıasatynyń strategıalyq baǵyttarynyń biri sanalady, sondyqtan 2021 jylǵy Ulttyq baıandamada Qazaqstan Respýblıkasy Táýelsizdiginiń 30 jyly ishindegi jetistikter, sátti qadamdar men jastardyń ózekti máseleleri sıaqty jastar saıasatynyń damý dınamıkasy men úrdisterin taldaý mańyzdy boldy. Taldaý qorytyndysy boıynsha, jastar salasyn odan ári júıeli ári keshendi damytý boıynsha memlekettik jáne azamattyq sektor úshin usynymdar ázirlendi», - dep aıtyp ótti.
«Jastar» ǵylymı-zertteý ortalyǵynyń dırektory Aıan Sakoshev jastar ortasyndaǵy mańyzdy ózgerister men aktýal trendterge nazar aýdardy. Ol demografıa, densaýlyq, bilim jáne ǵylym sıaqty jastar damýynyń mańyzdy áleýmettik parametrleri týraly egjeı-tegjeıli habardar etip, jas qazaqstandyqtyń beınesin, táýelsizdik urpaǵynyń portretin jáne jastardyń táýelsizdikke degen kózqarasyn tanystyrdy.
Baıandamany daıyndaý barysynda memlekettik organdardyń, halyqaralyq uıymdardyń, zertteý ınstıtýttarynyń aktýal statısıkalyq jáne analıtıkalyq derekteri qoldanyldy.
2021 jyly «Jastar» ǵylymı-zertteý ortalyǵy júrgizgen áleýmettaný zertteýleriniń nátıjeleri qazaqstandyq jastardyń áleýmettik kóńil-kúıin taldaý kezinde bazalyq negizge aınaldy.
«Qazaqstan jastary – 2021: Táýelsizdikke – 30 jyl» ulttyq baıandamasyn ázirleýge qatysqan avtorlar ujymy jastardyń ekonomıkalyq minez-qulqy, azamattyq jáne saıası qatysýy, qundylyq baǵyttary týraly aıtyp berdi.
Qoldanbaly etnosaıası zertteýler ınstıtýty dırektorynyń orynbasary Dana Áshimhanova búgingi tańda qazaqstandyq jastardyń ereksheligi qundylyq baǵdarlarynyń ózindik sımbıozynda, atap aıtqanda, dástúrli jáne zamanaýı kózqarastardyń toǵysýy men qabattasýynda ekenin atap ótti. Bul rette qazaqstandyq jastarǵa joǵary mobıldik, dıdjıtaldaný, sıfrlandyrý sıaqty álemdik trendter tán.
S. Toraıǵyrov atyndaǵy Pavlodar memlekettik ýnıversıtetiniń profesory Aslan Ázerbaev jastardyń basym bóligi úshin turaqty jumys isteý senimdilik pen damý múmkindiginiń sharty ekenin atap ótti. Jastar arasynda tabysqa jetý tujyrymdamasy mansap satysymen jyldam alǵa jyljýdy jáne qolaıly tabysty bildiredi.
Ulttyq baıandama boıynsha saraptamalyq baǵasyn Parlament Májilisiniń depýtattary Iýlıa Kýchınskaıa men Elnur Beısenbaev, sondaı-aq «Rýhanı jańǵyrý» ortalyǵynyń basshysy Janar Buqanova da bildirdi.
Jalpy, otandyq jáne halyqaralyq sarapshylar jastar ortasynda bolyp jatqan úderisterge tereń zertteýler júrgizýdiń, jastardyń áleýmettik kóńil-kúıine turaqty monıtorıń júrgizýdiń mańyzdylyǵy men qajettiligin atap ótip, «Qazaqstan jastary» ulttyq baıandamasy Qazaqstan jastarynyń onyń tynys-tirshiliginiń negizgi salalaryndaǵy jaǵdaıyna jan-jaqty taldaý jasalatyn negizgi ǵylymı qujat ekenine senim bildirdi.
İs-shara sanıtarlyq-epıdemıologıa normalaryn saqtaı otyryp, onlaın jáne oflaın formatta ótti.