Internet-alaıaq Nur-Sultanda joq páterlerdi jalǵa berýmen aınalysqan
Kıberqylmystyń aldyn alý jáne oǵan qarsy turý maqsatynda elorda aýmaǵynda «Hi-Tech» atty jedel aldyn alý is-sharasy ótkizilýde, dep habarlaıdy Almaty-akshamy.kz Polisia.kz-ke silteme jasap.
İs-shara barysynda alǵashqy kúnniń ózinde krımınaldyq polısıa qyzmetkerleri 14 kıberqylmysty ashty jáne 5 adamdy ustady.
Máselen, Almaty qalasynyń turǵyny bir aı boıy úıde otyryp, ınternet arqyly Nur-Sultandaǵy páterdi jalǵa berýmen aınalysqan. Elordanyń 25 turǵyny jalǵan habarlamanyń qurbany bolǵan. Jábirlenýshiler jalǵa berýshiniń ótinishi boıynsha kepilaqyny aldyn ala elektrondy túrde aýdaryp, keıin páterdi kóretin bolǵan. Alaıda páterdi kórýge kelgende ǵana alaıaqtyqqa tap bolǵandaryn túsingen.
Barlyq faktilerge sáıkes, QR QK-niń 190-baby (Alaıaqtyq) boıynsha qylmystyq is qozǵaldy. Sondaı-aq, kúdikti 400 000 teńgeni qolma-qol aqshaǵa aınaldyryp, óz qajetine jumsaǵany belgili boldy. Elordalyq polısıa qyzmetkerleri qylmysty ashýmen qatar ákimdikpen, eriktilermen birlesip, profılaktıkalyq is-sharalar júrgizýde.
Adamdar kóp jınalatyn oryndarda ınternet-alaıaqtyqtyń aldyn alý boıynsha aqparattyq-túsindirý materıaldaryn taratyp, aksıalar ótkizýde. LED-ekrandarda kıberalaıaqtyqtyń eń jıi kezdesetin túrleri týraly beınerolıkter ornalastyrylǵan.