Úsh jyldan soń sektor shamamen 200 myńǵa deıin mamannyń jetispeýin sezinýi yqtımal.
Sarapshylardyń aıtýynsha, kásiporyndar búginniń ózinde kem degende 18 myń bos oryndy jabýy kerek. Al, bul bir jyl burynǵy kórsetkishten 60%-ǵa kóp, dep habarlaıdy Almaty-akshamy.kz Qazaqtv.com saıtyna silteme jasap.
Eńbek resýrstaryn damytý ortalyǵynyń sarapshylary bar gáp básekege qabiletsiz jalaqy, «qyzmetkerlerdiń qartaıýy» jáne jastar úshin jumysshy kásipteriniń tartymsyz bolýynda dep sanaıdy. Máselen, óńdeý ónerkásibinde qazir jumyspen qamtylǵan jastardyń úlesi bar bolǵany 20% quraıdy.
"Nelikten tapshylyq bar? Árıne, bul eń aldymen jalaqynyń tómendigimen baılanysty. Máselen, búginde elektrondyq eńbek bırjasynda ónerkásip salasynda 6 myńǵa jýyq bos jumys orny bar. Ondaǵy ortasha jalaqy 130 myń teńgege jýyqtaıdy. Árıne, eńbek aqysy mıllıon teńgege deıin jetetin ınjenerler bar, biraq mehanık, tehnık syndy suranysqa ıe, ıaǵnı 2-3 jyl oqyǵan mamandardyń eń tómengi aılyǵy shamamen 60 myń teńge baǵalanady. Sondyqtan búgingi jalaqy kóterilmeı kásiporyndar kóp uzamaı kadrlyq tapshylyqty bastan keshiretini sózsiz", - deıdi QR eháqm eńbek resýrstaryn damytý ortalyǵynyń Basqarýshy dırektory Aleksandra Molchanovskaıa.
Jumys joq emes, bar. Mamandar da jetkilikti. Alaıda, suranys jumys berýshiniń usynysyna sáıkes kelmeı, tehnıkalyq mamandar ózge kásipti meńgerýge májbúr.
"Jastardyń 40% jýyǵy óz mamandyǵy boıynsha jumys istemeıdi. Ia, olar 2-3 jyl oqydy, aralarynda tehnıkalyq grant alǵandary bar. Tek keıin bul kásiptiń óte tómen baǵalanatynyn kóredi. Sondyqtan, jumys kestesi ózine qolaıly, aılyǵy birneshe ese joǵary qyzmet kórsetý salasyna ketýge májbúr bolady. Árıne, árkim ózine tıimdisin tańdaıdy ǵoı", - deıdi QR Eńbek resýrstaryn damytý ortalyǵynyń Basqarýshy dırektory Aleksandra Molchanovskaıa.
Bul oraıda aıta keterlik jaıt, ónerkásip salasyndaǵy bos jumys oryndarynyń úshten birinen astamy elimizdiń úsh óńirine tıesili. Kadrlarǵa degen eń joǵary qajettilik Qostanaı, Qaraǵandy, jáne Almaty oblystarynda tirkelgen. Sonymen qatar, sońǵy ýaqytta qarjy jáne saqtandyrý qyzmeti, memlekettik basqarý, densaýlyq saqtaý, kólik jáne qoımalaý salasynda maman tapshylyǵy baıqalady.