Almaty qalalyq onkologıalyq ortalyǵy jáne Ortalyq qalalyq klınıkalyq aýrýhana bazasynda amerıkandyq dárigerlerdiń qatysýymen «Onkoýrologıa jáne ýrologıadaǵy zamanaýı tásildemesi» atty bes kúndik sheberlik saǵaty ótkizildi.
Atalmysh master-klass qoǵamdyq densaýlyq basqarmasynyń sheshimi boıynsha jergilikti búdjet esebinen júrgizilýde, dep habarlaıdy Almaty-akshamy.kz
İs-sharaǵa emhana jáne stasıonardyń ýrolog-dáriger jáne onkoýrolog-dárigerleri, qalanyń medısınalyq ýnıversıteti kafedrasynyń qyzmetkerleri, rezıdentter, ınternder, sondaı-aq, Nur-Sultan qalasynan, Semeı jáne t.b. aımaqtardan kelgen dárigerler qatysty. Ortalyq qalalyq klınıkalyq aýrýhananyń konferens-zalynda onlaın túrde operasıa kórsetildi.
Onkohırýrgıa bólimshesiniń meńgerýshisi Nurlan Baltaevtyń aıtýynsha, bul master-klass amerıkandyq áriptesterdiń óziniń is-tájirıbesimen bólisýge jáne almatylyq dárigerlerdiń tájirıbesine eń myqty tehnologıalardy engizý úshin kózdelgen. Alǵashqy kúni úsh operasıa júrgizildi.
«Birinshi operasıa qýyqtyń qaterli isigimen aýratyn naýqasqa jasaldy, naýqasta jaıylǵan úderis - oń jaq nesep jolynyń óskinderi belgilengen qaterli isiktiń ınvazıvtik túri, ıaǵnı, nesepaǵar joly oń jaq búırek jaǵynan buzylǵan. Sondyqtan da «ashyq» (laparoskopıa jolymen emes) operasıa túrin jasaýǵa sheshim qabyldandy. Operasıa kezinde naýqasqa qýyǵyn jáne qýyq asty bezin alyp tastap, ishekten jańa nesep jolyn qalyptastyrdy. Keıinnen, alynǵan tinderdiń taldamasynan soń qajetti bolǵanda, emdeý úderisiniń kelesi satysy belgilenedi»- deıdi maman.
Ekinshi operasıa «Sol jaq búıreginiń qaterli isigi» dıagnozymen operasıa júrgizildi, onda da isik úlken bolyp ulǵaıyp kteken. Bul jaǵdaıda onkoýrologtar laparoskopıa jolymen naýqasqa sol búıregin alyp tastady. Búgingi kúni isik aýrýlary kezinde qýyq asty bezi men qýyqty alyp tastaý boıynsha radıkaldy operasıalar qalamyzda dara túrde júrgiziledi. Sol sebepti atalmysh master-klass ózekti jáne ýrologtardyń erteden anyqtap dıagnostıkalaý jáne emdeý bilimi men daǵdylaryn arttyrýǵa, qýyq jáne qýyq asty beziniń qaterli isigi kezindegi shaǵynınvazıvti jáne joǵary tehnologıalyq operasıalardy júrgizý tájirıbesin meńgerýge baǵyttalǵan.
«Master-klass tarapynda bizdiń mamandar onkoýrologıalyq operasıa júrgizýdegi tájirıbelerimen bólisti, biz amerıkandyq áriptesterimizdiń qandaı ádisterdi qoldanatynyn aıqyn kórip, olardyń tájirıbesin ózimizdikimen salystyrdyq», - dep túıindedi Nurlan Baltaev.
Budan ári, júrgizilgen operasıadan soń, amerıkandyq áriptester OQKA bazasynda onkoýrologıalyq aýrýshańdyq taqyryby boıynsha, máselen, qýyq asty beziniń qaterli isigin emdeýdegi zamanaýı ádister, radıkaldy sıstprostatektomıa kezindegi nesep jolyn derıvasıalaý ádisteri jáne radıkaldy operasıa kórsetkishteri týraly jáne t.b. dárister júrgizedi.
