Elimizde Konstıtýsıalyq Sot sýdıalarynyń ókilettik merzimin 8 jylǵa deıin ulǵaıtý kózdelip otyr.
Bul týraly QR Parlamenti palatalarynyń birlesken otyrysynda Ádilet mınıstri Qanat Mýsın aıtty, dep habarlaıdy Almaty-akshamy.kz.
«Álemdik praktıkaǵa sáıkes, Konstıtýsıalyq Sot sýdıalarynyń ókilettik merzimi olardy taǵaıyndaıtyn adamdardyń ókilettik merziminen asyp ketýi kerek. Mysaly, Germanıa, Italıa, Ispanıa, Portýgalıa jáne basqa da birqatar elderdiń konstıtýsıalyq sottary osylaı qalyptasady. Bul Konstıtýsıalyq Sot sýdıalarynyń ártúrli saıası kúshterdiń áserinen táýelsizdiginiń negizgi kepili», - dedi «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» zań jobasyn tanystyrǵan mınıstr.
Qanat Mýsınniń atap ótýinshe, osyǵan baılanysty zań jobasynda Konstıtýsıalyq Sottyń sýdıalary qaıta taǵaıyndalýyna shekteý qoıa otyryp, Konstıtýsıalyq Sot sýdıalarynyń ókilettik merzimderin 8 jylǵa deıin ulǵaıtý kózdelgen.
Buǵan deıin Q.Mýsın astana ataýyn qaıtarýǵa qatysty aıta kele: «Elorda ataýyn ózgertý máselesin azamattar uzaq ýaqyt boıy keńinen talqylaýda. Ol kezdesýler barysynda jáne referendým kezinde azamattardyń úndeýlerinde kóterildi. Sondyqtan qoǵamdyq pikirdi eskere otyryp, depýtattardyń bul usynysy zań jobasyna engizildi», - degen bolatyn.
Sondaı-aq Ádilet mınıstri Prezıdenttiń mandatyn qaıta saılaný múmkindiginsiz bir merzimge shekteý týraly norma Konstıtýsıanyń ajyramas bóligine aınalatynyn atap ótti.