Qazaqstan-Italıa bıznes-forýmy aıasynda ózara is-qımyl múmkindikteri talqylandy.
İs-shara eki eldiń syrtqy saıası vedomstvolary, Italıanyń «Confindustrie» Ónerkásip jalpy konfederasıasynyń, ICE agenttiginiń, «Kazakh Invest» ulttyq kompanıasynyń jáne «Atameken» UKP-nyń qoldaýymen uıymdastyryldy, dep habarlady Almaty-akshamy.kz. QR Syrtqy ister mınıstrligine siltemelep.
Forýmdy QR Premer-Mınıstriniń orynbasary – Syrtqy ister mınıstri Muhtar Tileýberdi men Italıa Respýblıkasynyń Syrtqy ister jáne halyqaralyq yntymaqtastyq mınıstri Lýıdjı Dı Maıo ashty.
M.Tileýberdi óz sózinde 1992 jyldan bastap ıtalándyq kompanıalar bizdiń elimizge shamamen 9 mlrd AQSH dollaryn ınvestısıalaǵanyn jáne búginde Qazaqstanda ıtalándyq kapıtaly bar 270-ten astam kásiporyn tabysty jumys istep kele jatqanyn atap ótti. Bizdiń elimizde 1992 jyldan beri jumys istep kele jatqan jáne munaı-gaz salasynda birqatar mańyzdy jobalardy iske asyrǵan ıtalándyq ENI transulttyq kompanıasynyń Qazaqstan ekonomıkasyna qosqan úlesi erekshe atap ótildi. Sonymen qatar, sońǵy jyldary Qazaqstanda jańartylatyn energıa kózderi salasyndaǵy Aqtóbe oblysynda jel elektr stansıasynyń qurylysy jáne Túrkistan oblysynda kún elektr stansıasynyń qurylysyn bastaý sıaqty jańa jobalar tabysty iske asyrylýda.
İs-sharaǵa 600-ge jýyq qazaqstandyq jáne ıtalándyq bıznesmender qatysty. Italándyq ınvestorlarǵa qazaqstandyq ekonomıkanyń agroónerkásiptik keshen, jańartylatyn energıa kózderi, mashına jasaý jáne basqa da sektorlardaǵy jobalar tanystyryldy. Olar jaqyn arada ıtalándyq "NEOS" kompanıasynyń Mılan men Almaty arasyndaǵy tikeleı áýe reısin iske qosýyn quptady. Atalǵan áýe qatynasy eki el arasyndaǵy iskerlik jáne týrısik baılanystardy damytýǵa eleýli úles qosýy tıis.