Bul - biregeı sportshynyń bıylǵy 70 jyldyǵyna arnalǵan aıtýly sharanyń basy.
Búgin dańqty sportshy, Máskeý Olımpıadasynyń júldegeri, Qazaqstannyń Eńbek Eri Jaqsylyq Úshkempirovtiń ómir joly týraly jazylǵan «Birtýar-Ýnıkalnyı» kitaby oqyrmanǵa jol tartty, dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Kitap avtory, jazýshy, Qazaqstannyń eńbek sińirgen qaıratkeri, «Alash» ádebı syılyǵynyń ıegeri Sáýle Dosjanova bul romanda Jaqsylyq Úshkempirovtiń balalyq shaǵynan aty ańyzǵa aınalǵan dańqty kezeńine deıingi ǵıbratty ǵumyryn arqaý etken. Kitap Almaty oblysy ákimdiginiń qoldaýymen jaryq kórgen.
Kitaptyń Taldyqorǵandaǵy Saltanat saraıynda ótken tusaýkeserine oblys ákimi Amandyq Batalov, qoǵam jáne memleket qaıratkeri, general-polkovnık Sát Toqpaqbaev, kitap avtory, jazýshy Sáýle Dosjanova, Qazaqstan Jazýshylar odaǵy basqarma tóraǵasynyń orynbasary Baýyrjan Jaqyp, Jaqsylyq Úshkempirovtiń jary Kúlpan Muqashqyzy men uldary Eldos pen Jeńis, birqatar tanymal jattyqtyrýshylar men belgili sportshylar jáne óńirdegi zıaly qaýym ókilderi qatysty.
Aldymen qonaqtar foıege qoıylǵan Sáýle Dosjannyń kitaptarynan jasaqtalǵan kórmemen tanysty. Munan soń dóńgelek ústel basynda saltanatty jıyndy ashqan oblys ákimi Amandyq Batalov eljandy azamat, dańqty sportshy Jaqsylyq Úshkempirovtiń el sportyn damytýǵa, týǵan jerin túletýge, aýyl sharýashylyǵyn órkendetýge qosqan úlesi týraly qysqasha aıtyp ótti.
«Jaqsylyq Úshkempirov barsha qazaqtyń Jaqsylyǵy edi, bolmysy taza, bilekti de júrekti, baýyrmashyl, qarapaıym jan edi. Jaqsylyq aǵamyzben men kóp jyl jaqyn aralasyp, dos boldym. Olımpıadadaǵy jeńisti joly, Elbasynyń qolynan Qazaqstannyń Eńbek Eri ataǵyn alýy, aýyl sharýashylyǵynda jemisti jumys istep, óńir halqyna meıirim-shapaǵatyn tıgizgeni – osynyń bárin biz jastarǵa úlgi etýimiz kerek. Jazýshy Sáýle Dosjannyń Jaqsylyq aǵamyz týraly jazǵan kitabyna qoldaý jasap, búgin tusaýkeserin ótkizip otyrmyz. Sharaǵa Úshkempirovter otbasynan jary, balalary qatysyp otyr. Búginde Eldos ákesiniń izin basyp, oblystyń qoǵamdyq ómirine belsene aralasyp keledi. Jaqsylyq Úshkempirovtiń sporttaǵy jolyn jalǵaıtyn órenderdi tárbıeleýge de bar jaǵdaı jasap kelemiz. Elbasynyń tapsyrmasymen oblysta 16 sport keshenin saldyq», - dep atap ótti Amandyq Batalov.
Sol sıaqty oblys ákimi óz sózinde áıgili sportshynyń esimin oblystyq balalar men jasóspirimder mektep-ınternat kolejine berý jumystary júrip jatqanyn da atap ótti.
Munan soń sóz alǵan memleket jáne qoǵam qaıratkeri, general-polkovnık Sát Toqpaqbaev bıyl el Táýelsizdiginiń 30 jyldyǵy ekenin, sonyń aıasynda daraboz sportshynyń ǵıbratty ǵumyryn kitap etip shyǵarýdyń mańyzy zor ekenin atap ótti.
Sol sıaqty Jaqsylyq Úshkempirovtyń jary Kúlpán Muqashqyzy jazýshy Sáýle Dosjanovaǵa, shyǵarmaǵa qoldaý tanytqan oblys basshylyǵyna rızashylyǵyn jetkizdi. Qazaqstan Jazýshylar odaǵy basqarma tóraǵasynyń orynbasary Baýyrjan Jaqyp bıylǵy Balalar ádebıetin qoldaý jylynda osyndaı taǵylymdy kitap jazǵan qalamgerdiń, kitaptyń jaryq kórine járdemdesken oblystyń isi ózgelerge úlgi bolarlyq ekenin aıtty. Sol sıaqty J.Úshkempirovtiń dosy Nurmahan Qarataev sportshynyń adamgershilik, izgilik qasıetterine toqtaldy. Ǵalym, fılologıa ǵylymynyń doktory Aıgúl İsmaqova jańa týyndynyń balalar ádebıetine qosylǵan súbeli úles ekenin jetkizdi. Kitaptyń tusaýy kesilip, oqyrmandarǵa jol tartty.
Kitap «Balalar ádebıetin qoldaý jylyna» oraı Almaty oblysy ákimi Amandyq Ǵabbasulynyń qoldaýymen basyldy. Ǵumyrnamalyq kitapta palýannyń balalyq shaǵynan bastap úlken sportqa kelýine, Olımpıadanyń jeńis tuǵyryna kóterilýine deıingi ónegeli ómiri qamtylǵan.