MÁSKEÝ. QazAqparat – Qazaqstan quramasy Halyqaralyq armıa oıyndarynda tórt altyn, bir kúmis medal ıelenip, jalpykomandalyq esepte úshinshi oryn aldy, dep habarlaıdy Almaty-akshamy.kz Inform.kz-ke silteme jasap.
QR Qorǵanys mınıstrliginiń baspasóz qyzmetinen málim etkendeı, Máskeý mańyndaǵy «Alabıno» polıgonynda Halyqaralyq armıa oıyndarynyń saltanatty jabylýy ótti.
Sharaǵa Qorǵanys mınıstriniń orynbasary general-leıtenant Sultan Qamaletdınovtyń basshylyǵymen qazaqstandyq delegasıa qatysty.
Oıyndardyń beıresmı komandalyq esebinde Qazaqstan quramasy Reseı men Ózbekstan elderinen keıingi úshinshi oryndy ıelendi.
Atap aıtsaq, Qazaqstan komandasy Jambyl oblysynda ótken «Artılerıadan oq atý sheberleri» baıqaýynda altyn medal aldy. Áskerı qyzmetshilerimiz Qaraǵandy oblysynda «Taktıkalyq mergen» baıqaýynda da birinshi oryn aldy. Sondaı-aq úzdik nátıje Aqmola oblysynyń «Merıdıan» saıysynda, Armenıada ótken «Beıbitshilik jaýyngeri» saıysynda tirkeldi.
Budan bólek, Qazaqstannyń áskerı teńizshileri Ázerbaıjandaǵy «Teńiz kýbogynyń» kúmis júldesin jeńip aldy.
Kabardıno-Balkarıadaǵy «Elbrýs sheńberi» baıqaýynda áskerı álpınıserimiz birqatar kúrdeli tapsyrmany oryndap, tórtinshi orynǵa ıe boldy. Tartysty jarysta Reseı, Ózbekstan jáne Qytaı qarsylastary úzdik shyqty.
«Tank bıatlonynyń» aqtyq synyna bir qadam qalǵanda qazaqstandyq tankıster jartylaı fınal estafetasynda qytaılyq áskerı qyzmetshilerge jol berdi.
Aıta keteıik, VIII Halyqaralyq armıa oıyndary 12 eldiń 30 polıgonynda ótti. «ArHO-2022» baǵdarlamasy dalalyq, áýedegi jáne teńizdegi jaýyngerlik mashyqty kórsetý boıynsha 34 baıqaýdan turdy.
Qazaqstandyq áskerı qyzmetshiler jeti baıqaýda baǵyn synady, olardyń úsheýi el aýmaǵynda ótkizildi.