Úkimet bul kórsetkishti 2025 jyly 50%-ǵa jetkizýdi kózdep otyr.
Qazaqstan Úkimeti aldaǵy ýaqytta sportpen shuǵyldanatyn azamattar sanyn arttyrýdy kózdep otyr. Bul týraly Úkimettiń kezekti otyrysynda aıtyldy, dep habarlaıdy Almaty-akshamy.kz Primeminister.kz saıtyna silteme jasap.
Qazaqstan Premer-Mınıstri 2025 jyly sportpen aınalysatyndardyń úlesin 50%-ǵa deıin jetkizý kerek ekenin aıtty. Ol úshin salaýatty ómir salty men sporttyń paıdasy týraly keńinen nasıhattalýy tıis.
Sondaı-aq bul aýrý-syrqaýdyń aldyn alý, sporttyq ınfraqurylymdy keńeıtý jáne buqaralyq sport salasyn qarjylandyrýdy ulǵaıtý sekildi aýqymdy jumysty talap etedi.
«Osy maqsatta Memleket basshysynyń tapsyrmasy boıynsha shamamen 21 mlrd teńgeni kásibı sport túrinen alyp, buqaralyq sportqa qaıta baǵyttadyq. Onyń 6 mlrd teńgesi memlekettik sporttyq tapsyrysty qarjylandyrýǵa jumsaldy. Memlekettik tapsyrystyń arqasynda myńdaǵan bala sport seksıalaryna tegin barýǵa múmkindik aldy. Seksıalarǵa ketetin shyǵyndar búdjetten tólenedi. Ótken jyly respýblıka boıynsha 162 myń bala osyndaı múmkindikke ıe boldy. Al bıyl 275 myń bala qamtylady», — dedi Álıhan Smaıylov.
Memlekettik tapsyrys aıasynda sportpen shuǵyldanatyn balalardyń eń kóp úlesi Almaty qalasy men Almaty oblysynda tirkelgen. Ázirge Aqtóbe jáne Soltústik Qazaqstan oblystary kósh sońynda qalyp otyr. Buqaralyq sportqa baǵyttalǵan qarjynyń 4,9 mlrd teńgesi sporttyq ınfraqurylymdardy salýǵa jáne jóndeýge bólindi.
Ótken jyly elimizde 41 dene shynyqtyrý-saýyqtyrý kesheni iske qosylsa, onyń 32-si aýdan ortalyqtary men aýyldyq jerlerde paıdalanýǵa berildi. Aýyldardy sport nusqaýshylarymen qamtamasyz etý máselesi sheshimin taýyp keledi. Tek 2021 jyldyń ózinde 1833 aýylda sport nusqaýshysy degen shtattyq laýazym engizildi.
«2025 jyly árbir tirek aýylda sporttyq sharalar men seksıalardy uıymdastyrýǵa jaýapty jattyqtyrýshy nemese nusqaýshy bolady. Dene shynyqtyrýmen jáne sportpen aınalysý úshin sporttyq ınfraqurylym jasyna, turǵylyqty jerine jáne tabysyna qaramastan, barlyq azamattarǵa birdeı qoljetimdi bolýy tıis», — dedi QR Premer-Mınıstri.
Úlken sporttaǵy jetistikter buqaralyq sporttan bastaý alatynyn aıta ketken jón. Sportpen shuǵyldanatyn balalardyń qatary kóbeıgen saıyn kásibı sportqa barǵysy keletinderdiń sany da arta túsedi, deni saý, qýatty ulttyń negizin qalyptastyrady. Bul salany damytý qaǵıdattary men tásilderi Dene shynyqtyrý men sportty damytýdyń 2025 jylǵa deıingi tujyrymdamasynda kórinis tabady.
Osyǵan baılanysty Álıhan Smaıylov Mádenıet jáne sport mınıstrligine Bilim jáne ǵylym mınıstrligimen jáne ákimdiktermen birlesip, jergilikti búdjetten qosymsha qarajat bólý arqyly balalardy tegin sporttyq seksıalarmen qamtýdy ulǵaıtýdy tapsyrdy.
«Mádenıet jáne sport mınıstrligi Bilim jáne ǵylym mınıstrligimen jáne ákimdiktermen birlesip, bıylǵy 1 shildege deıin sporttyq ınfraqurylym joq eldi mekenderde olardy salý josparyn qabyldasyn», — dedi QR Premer-Mınıstri.
Óz kezeginde Densaýlyq saqtaý mınıstrligine Ulttyq ekonomıka, Aqparat jáne qoǵamdyq damý mınıstrlikterimen jáne ákimdiktermen birlesip, salaýatty ómir saltyn qalyptastyrý men aýrý-syrqaýdyń aldyn alý sharalaryn nasıhattaýdy kúsheıtý tapsyryldy.