"Qazaqstan halqyna" qoryndaǵy qarajat barlyq ózekti máselelerdi sheshýge jetpeıdi. Sondyqtan birinshi kezektegi túıindi mindetterdi naqtylaýymyz kerek. Olardyń qatarynda ataýly bilim granttary da bar.
Bul týraly «dóńgelek ústel» basynda ótken alqaly jıynda "Qazaqstan halqyna" qoǵamdyq qorynyń Basqarma tóraǵasy Bolat Jámishev aıtty, dep habarlaıdy Almaty-akshamy.kz.
"Atamekenim.kz sandyq platformasyna jumys istep jatqan stýdentterden, olardyń ata-analarynan 1500-ge jýyq ótinim kelip tústi. Onda olar oqý aqysyn tóleýge kómektesýdi suraıdy. Mysaly, kórý qabileti jáne termınaldy satydaǵy sozylmaly búırek jetkiliksizdigi boıynsha İ toptaǵy múgedektigi bar stýdentten ótinim kelip tústi. Gemodıalız arqyly ómir súrip jatqan qyz. Ol qorǵa JOO-da oqý aqysynyń qalǵanyn tóleý týraly ótinishpen qarjylyq kómek surady. Dál osyndaı ótinimder "Qazaqstan halqyna" QQ bilim granty baǵdarlamasyn iske qosýǵa negiz boldy", – dedi Bolat Jámishev.
Onyń aıtýynsha, bakalavrıat baǵdarlamasy boıynsha stýdentter men talapkerlerge barlyǵy 2350 grant bólinedi.
Qordyń Basqarma tóraǵasy bastapqyda 360 grant bólý josparlanǵanyn, biraq ótinishterdiń kóp bolýyna baılanysty bul san ulǵaıǵanyn atap ótti. Qor esebinen oqıtyn stýdentterge 40 myń teńge kóleminde shákirtaqy belgilengen. Talapkerler úshin bilim berý granttary men stıpendıalarynyń sany árbir JOO-ǵa 10 grantqa deıin ulǵaıtyldy. Ulttyq joǵary oqý oryndaryna 20-ǵa deıin grant beriledi. Baǵdarlamaǵa 79 JOO qatysady, onyń 27-si Almatyda ornalasqan.
Bolat Jámishevtiń aıtýynsha, sheshilmegen jáne sheshimin kútken máseleler az emes. Biraq qorda ótinishterge úlken kóńil bólinedi.
Kezdesýge 100 qala turǵyny qatysty. Bireýlerdi jeke sıpattaǵy máseleler tolǵandyrsa, ekinshilerdi qalalyq aýqymdaǵy taqyryptar tolǵandyratyny belgili boldy.
«Dóńgelek ústel» basyndaǵy áńgime eki saǵatqa sozyldy. Kezdesý syndarly ótti.
Esterińizge sala keteıik, 2022 jyldyń 11 qańtarynda Prezıdent Qasym-Jomart Toqaev Densaýlyq saqtaý, bilim berý jáne áleýmettik qoldaý salalaryndaǵy máselelerdi sheshý úshin "Qazaqstan halqyna" qoǵamdyq áleýmettik qor qurýdy tapsyrǵan bolatyn.