Aǵymdaǵy jyldyń 30 maýsymynda Memleket basshysy Qasym-Jomart Toqaev QR «Almaty qalasynyń aıryqsha mártebesi týraly» zańyna, onyń ishinde Qala qurylysy keńesin qurý týraly erejeni qamtıtyn túzetýlerge qol qoıdy. Onyń mindeti – qala qurylysy saıasatyn iske asyrý kezinde sheshimder qabyldaýdyń tıimdiligin arttyrý jáne qalanyń ornyqty jáne teńgerimdi damýyn qamtamasyz etý. Ózgerister alǵashqy resmı jarıalanǵan kúnnen keıin kúntizbelik 60 kún ótken soń, ıaǵnı 2022 jylǵy 1 qyrkúıekten bastap qoldanysqa engiziledi, dep habarlaıdy Almaty-akshamy.kz.
1 tamyzda Almaty ákimi E. Dosaevqa qala qurylysy keńesin qurý jónindegi qujattardyń jobasy usynyldy jáne qaýlyny, erejeni ázirleý jáne onyń quramyn bekitý jónindegi rásimder bastaldy. Búgin, 19 tamyzda, tıisti qaýlyǵa qala ákimi qol qoıdy.
Qujat arqyly Almaty qalasy ákimdigi bekitetin 23 adamnan aspaıtyn keńestiń quramy, sondaı-aq fýnksıalary, ókilettikteri, qurylymy men jumys tártibi bekitildi. Qala qurylysy keńesiniń músheleri – sáýlet, qala qurylysy, ýrbanıstıka, kólik, ınklúzıa, ekologıa, kreatıvti ekonomıka, áleýmettaný, ekonomıka jáne t.b. salalardaǵy sarapshylar. Sonymen qatar, keńes otyrystaryna qaralatyn máselelerdiń ereksheligine baılanysty shaqyrylǵan ózge sarapshylar da qatysa alady.
Almatynyń Qala qurylysy keńesi iske asyrýǵa usynylatyn qala qurylysy jáne sáýlet jobalary boıynsha sheshimderdi ashyq talqylaý jáne qabyldaý úshin konsýltatıvtik-keńesshi organ bolyp tabylady.
Qala qurylysy keńesiniń negizgi fýnksıalary:
- qala aýmaǵynda sáýlet, qala qurylysy jáne qurylys qyzmeti salasynda sheshimder qabyldaý kezinde memlekettik saıasatty iske asyrýda jergilikti atqarýshy organdarǵa járdemdesý;
- turǵyn úı, qoǵamdyq, komýnaldyq-óndiristik jáne ónerkásiptik keshenderdiń eskızdik jáne jumys jobalary, qoǵamdyq aýmaqtardy, saıabaqtardy, skverlerdi, baqtardy, býlvarlardy, arnaıy aımaqtardy qaıta qurý jobalary, ártúrli maqsattaǵy jeke ǵımarattar, ınjenerlik jáne kóliktik ınfraqurylym jelileri men qurylystary, óner obektileri, tarıh, sáýlet mádenıeti eskertkishteri boıynsha usynymdardy qaraý jáne ázirleý;
- ál-Farabı dańǵylynan joǵary qala qurylysy jáne jalpy qurylys jobalaryn qaraý;
- mádenı maqsattaǵy obektilerdi salý, rekonstrýksıalaý jáne jóndeý jónindegi jobalardy qaraý;
-turǵyn úı qoryn renovasıalaý boıynsha jobalardy qaraý.
Tolyǵaq silteme arqyly tanysalasz
Qala qurylysy keńesiniń quramy (www.gov.kz)