Almaty qalasynyń ákimdigi Qazaqstan halqy tilderi kúni men Ahmet Baıtursynulynyń týǵan kúnine oraı «Ana tilim – ardaǵym» atty merekelik is-shara ótkizdi.
Ortalyq demalys saıabaǵynda ótken merekege aqyndar men jazýshylar, óner qaıratkerleri, eńbek ardagerleri, saıası partıalar men úkimettik emes uıymdardyń ókilderi, qala turǵyndary men qonaqtary, stýdentter men oqýshylar qatysty.
- Qazaqstan halqy tilderi kúni merekesi 2018 jyldan beri ultymyzdyń ustazy Ahmet Baıtursynulynyń týǵan kúnine oraı toılanady. Almatyda A.Baıtursynuly eskertkishine gúl shoqtary qoıyldy. Ortalyq demalys saıabaǵynda merekelik is-shara uıymdastyryldy. Keshte estrada juldyzdary óner kórsetip, kórermenderge suraq-jaýap túrinde oıyndar ótkizildi. “Jańa ǵasyr” teatry qoıylym qoıdy, - dedi Almaty qalasy ákiminiń apparaty Tilderdi damytý jáne onomastıka bóliminiń basshysy Baqyt Qalymbet.
Sondaı-aq merekelik kesh aıasynda Almaty qalasynda memlekettik til saıasatyn júzege asyrýǵa atsalysyp júrgen memlekettik qyzmetkerler men qoǵam belsendileri Ǵylym jáne joǵary bilim mınıstriniń alǵys hatymen marapattaldy.
- Biz eki jarym jyldan beri qazaq tilin úıretip, qazaq tildi ortany qalyptastyryp kelemiz. 4 aılyq kýrstarymyz bar, aptasyna 3 ret sabaq ótedi. Búginge deıin 100-den astam adam keldi. Bul kýrstarǵa kez kelgen adam tegin qatysa alady, - dedi “Batyl bol” klýbynyń negizin qalaýshy Alekseı Skolozýbov.