«QazTransOıl» aksıonerlik qoǵamy naýryzda Germanıaǵa kelesi 20 myń tonna munaı tranzıtin júzege asyrýdy josparlap otyr.
Bul týraly atalǵan kompanıanyń baspasóz qyzmeti málimdedi, dep habarlaıdy Almaty-akshamy.kz.
«Qazaqstan Respýblıkasynyń Energetıka mınıstrligi bekitken munaıdy tasymaldaý kestesine sáıkes «QazTransOıl» AQ naýryz aıynda Germanıaǵa «Transneft» JAQ magıstraldyq munaı qubyry júıesi boıynsha «Adamova zastava» munaı tapsyrý pýnkti arqyly 20 myń tonna munaıdy tasymaldaýdy josparlap otyr», - dedi «QazTransOıl» AQ qoǵammen baılanys jáne ishki komýnıkasıalar departamentiniń dırektory Shyńǵys İlıasov.
Sonymen qatar atalǵan kompanıa bıylǵy jyldyń 1 toqsanynda Germanıaǵa «Adamova zastava» munaı tapsyrý pýnkti arqyly 300 myń tonna munaı tasymaldaý úshin tehnıkalyq múmkindiktiń baryn rastaıdy. Degenmen onyń naqty kólemi munaı kompanıalarynyń ótinimine baılanysty bolmaq.
Sondaı-aq, habarlamada aqpanda elimizden Germanıaǵa 20 myń tonna munaıdyń birinshi partıasy jetkizilgeni aıtylǵan.
Buǵan deıin Energetıka mınıstri Bolat Aqsholaqov Germanıaǵa alǵashqy munaı partıasyn aqpannyń sońyna deıin jóneltiletini týraly aıtqan edi.