Qazaqstan Ýkraına jaǵdaıynda BUU-da qabyldanǵan halyqaralyq qaǵıdattardy, atap aıtqanda aýmaqtyq tutastyq pen egemendikti moıyndaýdy negizge alady
Elimizdiń Ýkraınadaǵy Tótenshe jáne ókiletti elshisi Darhan Qaletaev «Vestı Ýkraına» portalyna suhbat berip, Qazaqstannyń kózqarasy týraly aıtty, dep habarlaıdy Almaty-akshamy.kz Baq.kz saıtyna silteme jasap.
Ýkraın basylymy Kıev pen Máskeý arasyndaǵy qarýly qaqtyǵysqa qatysty elshige úsh suraq qoıǵan.
Qaletaev suhbatta Qazaqstannyń Ýkraına tóńiregindegi jaǵdaıǵa úlken alańdaýshylyqpen qaraıtynyn aıtqan.
«Qaqtyǵysqa qatyspasaq ta, bolyp jatqan jaǵdaı — bizdiń halqymyz úshin aýyr qasiret. Dál qazir Ýkraına aýmaǵynda bolyp jatqan áskerı qaqtyǵys qatty alańdatady. Bul — bir nemese eki halyqtyń emes, kóptegen halyqtyń taǵdyryna áser etetin tragedıa», — dedi Darhan Qaletaev
Ýkraın jýrnalısi "Qazaqstan eki el arasyndaǵy qaqtyǵysta qaı taraptyń jaǵyna shyǵady?" dep suraǵan.
«Qazaqstan Ýkraına jaǵdaıynda BUU-da qabyldanǵan halyqaralyq qaǵıdattardy, atap aıtqanda aýmaqtyq tutastyq pen egemendikti moıyndaýdy negizge alady. Qazaqstannyń qazirgi áskerı-saıası janjalǵa tartylý yqtımaldyǵyna qatysty aıtylyp jatqan máselelerge nemese qaýipterge kelsek, birinshiden, qaǵıdaǵa saı ustanymymyz boıynsha eshkimge qarý-jaraq jetkizbeımiz. Ekinshiden, bizdiń ásker qorǵanys qaǵıdattaryn ustanady jáne áskerı qaqtyǵysqa qatyspaıdy. Sonymen birge, Qazaqstan óziniń egemendik quqyǵyn negizge ala otyryp, UQSHU-nyń (Ujymdyq qaýipsizdik sharty uıymy — red) áskerı-saıası odaǵyna qatysady. UQSHU mandaty naqty belgilengen. Qazaqstan UQSHU mandatynan tys qandaı da bir mindettemelermen baılanysty emes. UQSHU-ǵa qatysýǵa odaq elderinen tys áskerı operasıalar kirmeıdi», — dep jaýap bergen elshi.
Óz sózinde Darhan Qaletaev Qazaqstannyń Ýkraınadaǵy elshiliginiń jumysyna da toqtalǵan.
«Qazaqstannyń Ýkraınadaǵy Elshiligi áli kúnge deıin óz azamattaryn evakýasıalaýdy uıymdastyrý boıynsha óz mısıasyn oryndap jatyr. Biz basqa elderdiń azamattaryna, sonyń ishinde osy qıyn kezeńde bizge júgingen ýkraınalyqtarǵa kómek kórsetýden bas tartpaımyz», — dedi Darhan Qaletaev.