Qazaqstan Respýblıkasy Syrtqy ister mınıstrligi Qazaqstan Respýblıkasynyń IýNESKO jáne ISESKO isteri jónindegi Ulttyq komısıasy jáne Halyqaralyq Ortalyq Azıa zertteýler ınstıtýtymen birlese otyryp, qazaqstandyq dıplomattardyń mádenı jáne tabıǵı murany saqtaý salasyndaǵy áleýetin arttyrýǵa baǵyttalǵan jyl saıynǵy kýrstardy ótkizdi, dep habarlaıdy aqshamnews.kz
Cyrtqy ister mınıstrliginiń málimetinshe, 2022 jyldan bastap iske asyrylyp kele jatqan baǵdarlama dıplomattardyń kásibı daıarlyǵyn arttyrý jáne álemdik arenada mádenı jáne tabıǵı qundylyqtardy ilgeriletý maqsatynda álemdik murany saqtaý jónindegi halyqaralyq quraldardy qoldaný týraly teorıalyq jáne tájirıbelik bilim beredi.
Bul kýrstar Qazaqstan aýmaǵynda alǵash ret uıymdastyryldy. Jetekshi óńirlik jáne halyqaralyq sarapshylarmen birge kýrs qatysýshylary IýNESKO-nyń Dúnıejúzilik muranyń negizgi nysandary – Qoja Ahmet Iasaýı kesenesi men Aqsý-Jabaǵly tabıǵı qoryǵyn, sondaı-aq Túrkistan, Otyrar, Saýran, Kúltóbe ejelgi qalashyqtardy qosa alǵanda, «Uly Jibek joly» transulttyq nomınasıasynyń áleýetti eskertkishterin aralap kórdi.
Bul baǵdarlama Qazaqstannyń joǵary halyqaralyq standarttarǵa sáıkes óziniń biregeı murasyn saqtap qalýǵa degen beıildiligin kórsetedi.
IýNESKO-nyń Dúnıejúzilik mura tizimine Qazaqstannan alty nomınasıa sheńberinde on jeti nysan engizilgen, bul IýNESKO-nyń Dúnıejúzilik mádenı jáne tabıǵı muralardy qorǵaý týraly konvensıasyna sáıkes olardyń saqtalýyn qamtamasyz etedi. Qazirgi ýaqytta Qazaqstan Dúnıejúzilik mura komıtetiniń múshesi bola otyryp, IýNESKO-nyń osy bedeldi tizimine jańa nysandardy engizý jónindegi sheshimderdi qabyldaýda jáne olardy qorǵaý jóninde usynystar beredi.