Almatyda belgili qazaq jazýshysy, jýrnalıs jáne qoǵam qaıratkeri Erkinbaı Ákimqulovqa arnalǵan eskertkish taqtanyń saltanatty ashylý rásimi ótti. Sharany Qazaqstan Jazýshylar odaǵy Basqarmasy tóraǵasynyń orynbasary Qasymhan Begmanov ashyp, júrgizdi. İs-sharaǵa elimizdiń belgili tulǵalary, qoǵam qaıratkerleri men jazýshylar qatysyp, Ákimqulovtyń shyǵarmashylyǵy men ádebıetke qosqan zor úlesin eske aldy.
Erkinbaı Ákimqulov – KSRO jáne Qazaqstan Jazýshylar men Jýrnalıser odaǵynyń múshesi. Ár túrli janrda qalam terbegen jazýshynyń 20-dan astam kórkem shyǵarmasy jaryq kórgen. Onyń ishinde "Shámshi Qaldaıaqov – án patshasy" roman-essesi men "Ózbekáli Jánibekov" ómirbaıandyq romany erekshe oryn alady. Ákimqulov pesalary, aýdarmalary men radıohabarlary arqyly ádebıet súıer qaýymnyń júreginen oryn tapqan.
Jazýshynyń eńbek joly "Lenınshil jas" (qazirgi "Jas Alash") gazetinde tilshi bolýdan bastalyp, keıinnen Almaty qalalyq partıa komıteti, "Jalyn", "Jazýshy", "Raýan" baspalary men "Kitap jarshysy" gazetinde jaýapty qyzmetter atqarýmen jalǵasty. Onyń ár maqalasy men ocherki halqymyzdyń ómiri men mádenıetin tanytýǵa baǵyttaldy.
Qazaqstan Jazýshylar odaǵy Basqarmasynyń tóraǵasy Mereke Qulkenov saltanatty jıynda bylaı dedi:
"Biz búgin qazaqtyń uly jazýshysy Erkinbaı Ákimqulov turǵan úıge eskertkish taqta ornattyq. Bul kósheler (Tóle bı, Abaı, Shevchenko) – qazaq jazýshylarynyń ómir súrip, shyǵarmalaryn jazǵan qasıetti oryndar. Ákimqulovtyń shyǵarmashylyǵy qazaq ádebıetine máńgilik mura qaldyrdy."
Shara barysynda jazýshynyń uly Qurman Ákimqulov ákesi týraly estelikterimen bólisip, onyń qarapaıymdylyǵy men qaıyrymdylyǵyn eske aldy. Sonymen qatar, balalary Ernar men Ǵabıden de ákeleriniń jolyn jalǵastyryp kele jatqanyn atap ótti.
Almaty qalasy Mádenıet basqarmasynyń basshysy Ǵanı Maılybaev, M.O. Áýezov atyndaǵy Ádebıet jáne óner ınstıtýtynyń dırektory Kenjehan Matyjanov jáne "Óner" baspasynyń dırektory Áshirbek Kópishev óz estelikterimen bólisip, Erkinbaı Ákimqulovtyń qazaq rýhanıatyndaǵy rólin erekshe atap ótti.
Eskertkish taqta – Erkinbaı Ákimqulovtyń ádebıet pen mádenıetke qosqan zor úlesin máńgi este saqtaý maqsatynda qoıylǵan qurmet belgisi. Qazaq rýhanıatyna óshpes iz qaldyrǵan tulǵanyń jarqyn beınesi el jadynda saqtalady.