Búgin Eýropa Odaǵy Reseıge baǵyttaǵan 11-shi sanksıa paketin jarıalady. Aldynǵylarynan aıyrmashylyǵy – sanksıalardy úshinshi bir memleket arqyly aınalyp ótýdiń aldyn alýǵa baǵyttaǵan. Bylaısha bul sanksıa serıasy Reseıge astyrtyn kómektesip jatqan memleketterdi nysanasyna alyp otyr.
Demek, bul Orta Azıa elderine, sonyń ishinde Reseımen tyǵyz saýda-ekonomıkalyq baılanysqa ıe Qazaqstanǵa da qatysty.
Sanksıa talaptaryna sáıkes, endigi jerde EO Reseıdiń áskerı áreketterine járdem bere alatyn taýarlardy eksporttaýǵa shekteý qoıady. Tikeleı Reseıge eksport erteden shektelgen. Aldaǵy ýaqytta astyrtyn kómek kórsetip otyr dep tanylǵan elderge de eksporttaýǵa tyıym salmaq.
Reseıdiń munaı ónimderine qatysty shekteýde kúsheıe túsken. Odaq músheleriniń porttaryna reseılik munaı ónimderin tasymaldaǵan kemeler kire almaı qalýy múmkin.
Ýkraına daǵdarysyna baılanysty Reseı men Eýropa elderiniń arasyndaǵy teke-tires ábden qatal bola túsken. Endi mine Reseıge sanksıadan jaltarýǵa kómektesti delingen úshinshi bir elder de sanksıaǵa ilingeli otyr.
Másele bizge de qatysty
Ýkraınada soǵys bastalyp, Batys sanksıasy kúsheıýimen qatar Orta Azıa elderine taýar tasymaldaý kólemi ilese kóbeıdi. EO aımaq elderi arqyly Reseıge eksporttaýǵa shekteý qoıylǵan taýarlar ótip ketip jatqanyna renish bildirip kelgen.
Bul máseleni aımaq elderiniń basshylarymen talqylaýǵa birer márte eýropalyq laýazymdylar da kelip qaıtqan. Tipti Eýropalyq komısıanyń tóraǵasy Sharl Mıshel de «Orta Azıa – EO» samıtinde máselege salmaq berip ketip edi.
Árıne, OA elderi úshin bul múlde yńǵaısyz jaǵdaı. Bir jaǵynda qýatty EO, endi bir jaǵynda ózine ekonomıkalyq ám saıası yqpaly basym Máskeý. Onyń ústine teńiz joldary túrli sebeptermen qysyla bastaǵan qazirgi kezdi aımaq elderi mańyzdy tranzıttik elderge aınalyp qaldy.
Qos taraptyń múdde qaıshylyǵyna baryp tireletin bul iste Qazaqstan, Qyrǵyzstan sekildi EAEO-ǵa múshe elderi úshin tipti syn kúshti. Sondyqtan eki eldiń úkimetteri osyǵan deıinde ózindik jaýap áreketterin jasap jatyr.