Respýblıka jahandyq uıymnyń róli men bedelin nyǵaıtýǵa úles qosýdy ári qaraı jalǵastyrýǵa nıetti.
Bul týraly Qazaqstannyń BUU-ǵa múshe bolýynyń 30 jyldyǵyna arnalǵan saltanatty sharada elimizdiń Jenevadaǵy bólimshesi men basqa da halyqaralyq uıymdar janyndaǵy turaqty ókili Erlan Álimbaev málimdedi, dep habarlaıdy Almaty-akshamy.kz
Mereıtoılyq is-sharaǵa qatysýshylar Ortalyq Azıada ıadrolyq qarýdan azat aımaq qurý, Azıadaǵy ózara is-qımyl jáne senim sharalary jónindegi keńesti odan ári ilgeriletý, sondaı-aq Sırıa boıynsha Astana prosesi aıasynda beıbit kelissózder júrgizý men konfesıaaralyq dıalogty yntalandyrý sekildi bastamalardaǵy Qazaqstannyń mańyzdy rólin atap ótti.
«30 jyl ishinde Qazaqstan BUU-nyń bedeldi múshesi boldy. Osy jyldar ishinde kópjaqty yntymaqtastyqtyń kún tártibine, qarýsyzdaný, turaqty damý maqsaty máselelerine kóp úles qosty. Qazaqstan – ıadrolyq qarýsyzdaný men ıadrolyq synaqtarǵa tyıym salǵan negizgi bastamashylardyń biri. Qazaqstan aýmaǵynda kóptegen úderis bolǵanyn da bilemiz. Sondyqtan ıadrolyq qarýdan óz erkimen bas tartqan jáne qarýsyzdaný máselesi boıynsha qajet sharalardy qabyldap jatqan memleket retinde Qazaqstannyń róli, árıne, qashanda óte mańyzdy ekenin aıtqym keledi», - deıdi BUU-nyń Jenevadaǵy bólimshesiniń bas dırektory Tatána Valovaıa.
BUU-nyń jáne basqa da halyqaralyq uıymdardyń joǵary laýazymdy ókilderi men qarýsyzdaný salasyndaǵy sarapshylary Qazaqstannyń halyqaralyq bastamalaryn qoldaýǵa jáne onyń halyqaralyq arenadaǵy ustanymyn nyǵaıtýǵa qosqan úlesi úshin el Táýelsizdiginiń 30 jyldyǵyna arnalǵan merekelik medalmen marapattaldy.
Sondaı-aq sarapshylar men dıplomattar Qazaqstannyń BUU Qaýipsizdik Keńesindegi turaqty emes músheligi men tóraǵalyǵynyń, Adam quqyqtary jónindegi keńesine músheliginiń nátıjeleriniń mańyzdylyǵyn atap ótti.