Qazaqstan boksy quramasynyń bas bapkeri Qaırat Sátjanov jýyrda Shymkentte ótken halyqaralyq týrnırdegi boksshylardyń óneri jaıly óz pikirin bildirdi, dep habarlaıdy aqshamnews.kz
Bapker barlyq salmaqtaǵy sportshylardyń ónerin jeke-jeke talqylap, jaraqat alǵan boksshylar men jańa maýsymdaǵy quram týraly oılarymen bólisti.
Eske sala ketsek, Shymkentte Qaraqozy Ábdálıevti eske alýǵa arnalǵan iri halyqaralyq týrnır ótti. Bul jarysqa qazaqstandyq kóptegen boksshylar qatysty, olardyń qatarynda qurama kóshbasshylary men rezervtegi sportshylar da boldy. Alaıda jaraqattarǵa baılanysty Aslanbek Shymbergenov, Nurbek Oralbaı jáne Qamshybek Qońqabaev bul týrnırde óner kórsete almady.
«Bizdiń boksshylar týrnırde jaqsy nátıje kórsetti. Jarys joǵary deńgeıde ótti. Ulttyq qurama sportshylarynyń barlyǵy derlik qatysty, tek jaraqat alǵan úsh sportshyny bosattyq: Aslanbek Shymbergenov, Nurbek Oralbaı jáne Qamshybek Qońqabaev. Nurbektiń murnyna ota jasaý qajet, sondyqtan ol biraz ýaqyt sharshy alańǵa shyǵa almaıdy. Al Qamshybek omyrtqasyndaǵy jaraqatpen emdelýde, Aslanbek te em qabyldap jatyr», – dedi Sátjanov.
Sátjanov týrnırde fınalǵa shyqqan sportshylardyń ónerine de baǵa berdi.
«Jarysqa 140 sportshy qatysty, olardyń arasynda Olımpıada men álem chempıonattarynyń júldegerleri boldy. Barlyq boksshylar joǵary deńgeıde óner kórsetti. Bizdiń jigitterdiń deńgeıi óte jaqsy boldy. Mysaly, Temirtas Júsipov pen Sanjar Táshkenbaı jaqsy daıyndyqpen keldi. Sanjar jaraqat alǵandyqtan jarystan shyǵýǵa májbúr boldy. Sonymen qatar, Orazbek Asylqulovtyń jekpe-jegine "5+" degen baǵa berdim», – dep atap ótti ol.
Sátjanov Beıbarys Jeksenniń de jaqsy óner kórsetkenin aıtty. Ol fınalda Serik Temirjanovty jeńip, óziniń jeńiske degen umtylysyn dáleldedi. Muhammedsabyr Bazarbaıuly 67 kelige deıingi salmaqta Ilá Kalınındi jeńip, óziniń myqtylyǵyn kórsetti. Ilá jas bolsa da, bolashaǵy zor boksshylardyń biri ekenin atap ótti.
71 keli salmaqta Sabyrjan Aqqalyqov týrnır jeńimpazy atandy. Abylaıhan Júsipovtiń kásipqoı boksta tájirıbe jınap, rıngke qaıtyp kelýi de mańyzdy jańalyq boldy. 92 keliden joǵary salmaqta Aıbek Oralbaı tórt jekpe-jektiń bárinde jeńiske jetti.
Sátjanov jaraqat alǵan boksshylardyń jaqyn arada tolyq emdelip, daıyndyqty jalǵastyratynyn da atap ótti.
Qazaqstan quramasynyń fınaldyq quramy jeltoqsan aıynda ótetin el chempıonatynan keıin anyqtalady. Sonymen qatar, Azıa chempıonatynda óner kórsetken sportshylarǵa el birinshiliginen bosatylatyny aıtyldy.
«Biz keıbir boksshylarǵa ózderiniń ádettegi salmaǵynan joǵary salmaqta óner kórsetýge ruqsat berdik, óıtkeni aǵzaǵa salmaq qýýdyń áseri zor. Bul sheshim sportshylardyń densaýlyǵyn saqtaý úshin jasaldy», – dep qorytyndylady Sátjanov.