Elimizdiń barlyq aımaǵynda sýarý maýsymy aıaqtaldy.
Vegetasıa kezeńi 1 sáýirde bastaldy. Qurǵaqshylyq týraly túrli boljamdarǵa qaramastan, Úkimet qajetti is-sharalardy qabyldap, sharýalardy sýarmaly sýmen úzdiksiz qamtamasyz etti, dep habarlaıdy aqshamnews.kz.
Sýarý kezeńinde Sý resýrstary jáne ırrıgasıa mınıstrligi sharýalarǵa 11,2 mlrd tekshe metrge jýyq sý berdi.
Bıyl mınıstrlikke vedimistik baǵynysty «Qazsýshar» mekemesiniń fılıaldary sharýa qojalyqtarymen sýarmaly sý berý jóninde 25 myńǵa jýyq kelisimshart jasady.
Sý tutyný kólemi boıynsha kósh basynda - Qyzylorda oblysy. Óńirdiń dıhandaryna 3,7 mlrd tekshe metr sý berildi. Túrkistan oblysynyń sharýalary 3,4 mlrd tekshe metr sý aldy. Jetisý oblysynyń dıhandaryna 1,37 mlrd tekshe metr sý berilse, Almaty oblysynyń sharýalary 1,57 mlrd tekshe metr sý paıdalandy.
«Úkimet tótenshe jaǵdaı men sýarmaly sý tapshylyǵynyń aldyn aldy. Biz byltyrǵy jaǵdaıdan tájirıbe jınap, sabaq aldyq. Osynyń nátıjesinde bıyl sharýalardy úzdiksiz sýarmaly sýmen qamtamasyz ettik. Sý dıplomatıasy da mańyzdy ról atqarǵanyn aıta ketken jón. Bıyl Ózbekstan, Qyrǵyzstan jáne Tájikstan elimizge bastapqyda boljanǵan kólemnen artyq sý jiberdi», – dedi Sý resýrstary jáne ırrıgasıa mınıstri Nurjan Nurjigitov.
Búgingi tańda Sý resýrstary jáne ırrıgasıa mınıstrligi sý tasqyny kezeńine daıyndyqty bastady. Elimizdiń soltústik, batys, shyǵys jáne ortalyq aımaqtaryndaǵy sý qoımalarynan sý jiberile bastady. Al, ońtústik oblystardaǵy sý qoımalary kerisinshe, sý jınaý rejıminde jumys istep jatyr.
Ortalyq Azıanyń memleketaralyq sý sharýashylyǵyn úılestirý komısıasynyń kelesi otyrysynda Naryn-Syrdarıa sý qoımalary kaskadynyń boljamdy jumys kestesi jasalady jáne kelesi jylǵa sý berý kólemi bekitiledi.