BUU komısıasy bitimgerlik operasıalarǵa qatysýǵa josparlanǵan qazaqstandyq áskerı qyzmetshilerdiń materıaldyq-tehnıkalyq bazasynyń jaı-kúıin jáne daıarlyq deńgeıine jan-jaqty tekserý júrgizdi.
Bir apta ishinde BUU Bitimgerlik operasıalar departamentiniń áskerı kontıngentterdi qalyptastyrý qyzmetin josparlaý ofıseri Sedrık Paskal bastaǵan ınspektorlar bitimgerlerdiń jabdyqtalýyn, tehnıkamen, qarý-jaraqpen, oq-dárilermen, zattaı, ınjenerlik, medısınalyq múlikpen jáne RHB-qorǵanys quraldarymen jabdyqtalýyn tekserdi, dep habarlaıdy almaty-akshamy.kz.
Bitimgerlik daıyndyq ádistemesi men júıesine, aǵylshyn tilin meńgerý deńgeıine erekshe nazar aýdaryldy.
– Onlaın-áńgimelesý barysynda BUU-nyń túrli qurylymdarynyń sarapshylary áskerı qyzmetshilerdiń genderlik teńdik jáne halyqaralyq gýmanıtarlyq quqyq máseleleri boıynsha bilimderin baǵalady, – dep naqtylady QR Qorǵanys mınıstrligi Bitimgerlik operasıalar ortalyǵynyń bastyǵy polkovnık Baýyrjan Nyǵmetýllın.
"Bitimger" oqý ortalyǵynyń bazasynda BUU ınspektorlary bitimgerlik bazasyn kúzetýdi qamtamasyz etý, tosqaýyl beketterdi uıymdastyrý, patrúldeý, jaraqat alǵan kezde alǵashqy medısınalyq kómek kórsetý jónindegi mindetterdi oryndaý kezinde bitimgerlerdiń úılesimdiligin tekserdi. Sondaı-aq, jarylǵysh qurylǵyny anyqtaý kezinde áreket etý algorıtmi pysyqtaldy.
Aıta ketý kerek, bizdiń kontıngent brondy dóńgelekti mashınalarmen jáne jol talǵamaıtyn kóliktermen jabdyqtalǵan.
– BUU standarttaryna sáıkes kontıngenttiń qarý-jaraǵynda turǵan tehnıka aq túske boıalǵan, sonymen qatar ol naqty mindettermen tolyq jabdyqtalǵan. Mysaly, brondalǵan dóńgelekti mashınalardyń biri alǵashqy medısınalyq kómek kórsetý jáne jaralylardy evakýasıalaý úshin qaıta jabdyqtalǵan, – dep túsindirdi materıaldyq-tehnıkalyq qamtamasyz etý basqarmasynyń bastyǵy – ortalyq bastyǵynyń orynbasary podpolkovnık Rýstam Janjúmenov.
BUU sarapshylary bitimgerlik kontıngentiniń jeke quramyn daıarlaýdyń jáne bitimgerlik operasıalar ortalyǵynyń nusqaýshy quramynyń kásibıliginiń joǵary deńgeıin atap ótti. Bitimgerlik kontıngenttiń bitimgerlik mısıasyn óz betinshe oryndaýǵa daıyndyǵyn baǵalaý jónindegi túpkilikti derekterdi BUU komısıasy 2024 jylǵy qańtarda usynatyn bolady.
