Bishkekte jer silkinisine tózimdi qurylys boıynsha halyqaralyq sarapshylar qaýymdastyǵynyń bazasynda seısmıkalyq qaýipsizdikti qamtamasyz etýdi arttyrý máseleleri talqylandy.
Dóńgelek ústelge halyqaralyq sarapshylar men ǵalymdar, sondaı-aq qurylys dınamıkasy jáne ǵımarattardy tabıǵı, tehnogendik áserlerden qorǵaý salasyndaǵy ǵylymı baıandamalar baıqaýynda baq synaǵan jas ǵalymdar qatysty, dep habarlaıdy almaty-akshamy.kz.
Dóńgelek ústel «Ortalyq Azıa elderindegi ǵımarattar men qurylystardyń jer silkinisine tózimdiligin arttyrý» taqyrybyna arnaldy. Onyń negizgi maqsaty – apat týyndaǵan jaǵdaıda qaýipsizdik máseleleri boıynsha jetekshi sarapshylar men ınstıtýttardyń jumysyn úndestirý.
Uıymdastyrýshylardyń aıtýynsha, qazirgi kezde sarapshylardyń nazaryn jer silkinisine tózimdi qurylys máselelerine aýdarý asa mańyzdy. Sebebi, apat aıtyp kelmeıdi demekshi, jer silkinisi de kez kelgen mezette oryn alýy múmkin. Sondyqtan bul árdaıym ózekti taqyryptardyń biri. Sol sebepti de dóńgelek ústel aıasynda Qazaqstan Respýblıkasyndaǵy ǵımarattar men qurylystardyń eksperımenttik synaqtary, ǵımarattardyń dınamıkasy men qaýipsizdigi salasyndaǵy jas ǵalymdardyń ǵylymı-eksperımenttik ázirlemelerin qoldaý, qazirgi jaǵdaıda halyqaralyq standarttar krıterııleri boıynsha mamandar daıarlaý sapasy boıynsha baıandamalar tyńdaldy.
İs-shara sońynda qatysýshylar osy saladaǵy ozyq ázirlemeler aıasynda pikir almasyp, seısmıkalyq qaýiptiligi joǵary aýdandardaǵy adamdar men obektilerdiń qaýipsizdigin qamtamasyz etýdiń mańyzdy máseleleri talqylady. Ǵalymdardyń pikirinshe, bul proses úzdiksiz jalǵasýy tıis.
Halyqaralyq konkýrsqa belsendi qatysqany úshin jas ǵalymdardyń 3 úzdik ǵylymı-zertteý jáne ǵylymı-praktıkalyq jobasy «Maurer» seismic Protection Systems nemis kompanıasy tarapynan joǵary baǵalanyp, dıplomdar men qarjylaı syıaqy jeńip aldy. Konkýrstyń ashyq, ári ádil ótýin jetekshi ǵalymdar, sarapshylar, akademıkterden turatyn arnaıy komısıa qadaǵalady.
